Read cisena MIYAMBI 21 Bible Online

MIYAMBI 21 - cisena bible

MIYAMBI 21

¹Mtima wa mfumu uli m'manja mwa MBUYA; iye ambautsogolera ninga madzi akukuka konsene kwene kunafuna iye kule.

²Njira zonsene za munthu zimbaoneka ninga zakulungama m'maso mwache, mbwenye MBUYA ndiye ambadziwa mtimache.

³Kuchita pyakulungama pontho chilungamo pimbatambirwa na manja mawiri pamaso pa MBUYA kupiringana nsembe.

⁴Kuyang'ana na nsonga ya diso, pontho mtima wakugaya, mphyakuipa mbipikhala ninga nyale kuna anyakudawika.

⁵Pinthu pimbasasanya kuchita munthu wa manja a basa pimbamganyalira, mbwenye kuchita pinthu mwamchunju kumbadzesa utcherengi.

⁶Mfuma yakugumanwa thangwi ya kulonga pyakunama, ndi mthunji yakutoya m'maso, pontho msampha wakupha.

⁷Kuzunguzika kwa nyakudawika kunati kumvunge, thangwi iye nkhabe funa kuchita pyakulungama tayu.

⁸Njira za munthu wakuipa nsakugongonyeka, mbwenye makhaliro a nyakukhonda dawa ngakulungama.

⁹Mphyadidi kukhala mwakufinyizika kunkhomo kwa nsoyi kusiyana na kukhala m'nyumba na mkazi wamulomo.

¹⁰Nyakudawika ambakhala na usa na kuchita pyakuipa; iye nkhabe vera nsisi tsanthembache tayu.

¹¹Nyakusingirira angatchunyuswa, pupwe ambadziwa mfolo; munthu wanzeru angapaswa uphungu, penepo ambakhala na udziwisi.

¹²Mulungu, Nyakulungama ule, ambadziwa pya m'nyumba ya anyakudawika, mbachitisa anyakudawika kuvungika.

¹³Ngakhala munthu anafunga makutu ache kuna kulira kwa anyakutcherenga, iyembo analira mbakhonda na kuviwa kwene.

¹⁴Mtukwa wakuperekwa chibiso-biso umbamatamisa kuzhangali, pontho kudyekera kumbambombowesa ukali.

¹⁵Chilungamo chingatewezwa anyakulungama ambakomerwa, mbwenye anyakudawika mantha ambaaphata.

¹⁶Nyakubauka panjira ya udziwisi, mamalisiro ache nkhugwera m'dziko ya anyakufa.

¹⁷Nyakukomerwa na tsenzo anati atcherenge; nyakukomerwa na vinyu pontho mafuta nkhabe dzafuma tayu.

¹⁸Anyakudawika anakhala chakupagalira anyakulungama, pontho anyakukhonda khulupirika anakhala chakupagalira anthu adidi.

¹⁹Mphyadidi kukhala pyako m'thando yatchetcha kusiyana na kukhala na mkazi wamulomo pontho wachipsu.

²⁰M'nyumba ya munthu wanzeru mumbakhala mfuma, mbwenye pupwe ambachita phata dyeratu pyonsene pina iye.

²¹Nyakukakamira kuchita pyakulungama pontho kukoma mtima, ambagumana moyo, kufamba mwadidi kwa pinthu na chilemedzo.

²²Nyanzeru anakwanisa kukunda mzinda wa anyamphamvu, mbagwisa mpanda wamphamvu umbanyindira iwo ule.

²³Nyakuyang'anira mulomo pontho lulume yache, nkhabe kupidzesera yekha ene nyatwa tayu.

²⁴Munthu wakugaya pontho kutumbama, nyakusingirira ndiye dzinache; thangwi iye ambachita pinthu mwakulunkuma.

²⁵Usa wa nyakupolola unakhala imfa kuna iye, thangwi manjache nkhabe funa phata basa tayu.

²⁶Nsiku yonsene iye ambakhala na usa kufuna pizinji, mbwenye anyakulungama ambapereka mwakufewa manja.

²⁷Nsembe ya nyakuipa njakunyansa; ndi tani apo angaipereka na manyerezero akuipa.

²⁸Mboni yakunama inagwandwa m'kanwa, mbwenye nyakuvesa pinthu anatawiriswa kupereka umboni.

²⁹Nyakuipa ambafuna kupionesa ninga wakuwanga mtima, mbwenye nyakulungama ambanyerezera mwadidi pinthu pimbachita iye.

³⁰Nee nzeru, kuvesa pinthu, penu uphungu, pile pinakwanisa kupiringana MBUYA.

³¹Kavalo ambasasanyikira nsiku ya kumenya nkhondo, mbwenye kukunda kwagona m'manja mwa MBUYA.