Read cisena MIYAMBI 22 Bible Online

MIYAMBI 22 - cisena bible

MIYAMBI 22

¹Mbiri yadidi njakukhumbika pyakwanga kupiringana mfuma izinji; chilemedzo ntchadidi pyakwanga kupiringana siliva na golidi.

²Nyakufuma na nyakutcherenga ntchibodzi-bodzi: MBUYA ndiye nyakualenga onsenewo.

³Nyakuchenjera angaona chakugoswa ambabisala, mbwenye pupwe ambaenda konthoko, mbakaonako nyatwa.

⁴Kupichepesa na kugopa MBUYA pimbadzesa mfuma na chilemedzo, pontho moyo.

⁵Njira ya nyakudawika njakuphopha na minga pontho misampha, mbwenye nyakuyang'anira moyo wache ambachalira pinthu penepi.

⁶Funzisa mwana njira yathema iye kuteweza, tenepo angathuthuka iye nkhabe dzabauka tayu.

⁷Anyamfuma ambatonga anyakutcherenga, pontho nyakufiyali ndi bitchu wa nyakumfiyalisa.

⁸Nyakubzala pyakudawa ambavunambo nyatwa, pontho ndodo ya ukali wache inavungwa.

⁹Nyakufewa manja anati atsanzayiswe, thangwi iye ambagawana na anyakutcherenga phoso yache.

¹⁰Kuthamangisa nyakusingirira nkhubulusa mapoko-poko pamsuwo; nthonga pontho kutikana pimbamalambo.

¹¹Nyakukomerwa na mtima wakuona pontho malongero adidi, anati akhale shamwaliache mfumu.

¹²MBUYA ambayang'anira mwadidi udziwisi, mbwenye ambadzudzumisa mafala a anyakukhonda khulupirika.

¹³Mpololi ambalonga kuti, “Kunjaku kuna nkhalamu!” Penu, “Ndikugopesera kuphiwa mumsewu!”

¹⁴M'kanwa mwa puta ndi dzenje yakuzwika; nyakuzhangalirwa na MBUYA anati agweremo.

¹⁵Kupupwa kumbakhala mumtima mwa mwana, mbwenye mtswamu wakumtchunyusa nawo unabulusa kupupwako.

¹⁶Nyakupondereza anyakutcherenga, towera athimizire mfumacheyo, pontho nyakupereka mitukwa kuna anyakufuma, onsene uwiriawo anasanduka akutcherenga.

¹⁷Ikha mtimako pana pinthu pinakufunzisa inepi, pontho vesera mwadidi mafala a anthu a nzeru,

¹⁸thangwi ntchinthu chadidi ungapikoya mumtima mwako, pontho mbusasanyika kupilonga pandzidzi wache wakuthema.

¹⁹Towera ukwanise kunyindira MBUYA, lero ndakufunzisa pinthu penepi; ande, kuna iwepo.

²⁰Ayi ine sidakulembere tayu pifunziso makumatatu, pifunziso pyauphungu pontho pyanzeru,

²¹pyakukufunzisa mafala akuona pontho akunyindirika, towera utawire mwadidi anyakukutuma ale?

²²Leka bera nyakutcherenga, thangwi iye ndi nyakutcherenga, pontho leka pondereza anyakusowa pinthu m'thando ya miseru,

²³thangwi MBUYA anati aaikhire kunduli, pontho iye anapokosera moyo wa anyakuapokoserambo.

²⁴Leka chita ushamwali na munthu waukali, pontho leka phatizana na nyachipsu,

²⁵gopesera unakwatira makhaliro achewo, mbumalisira kugwera mumsampha.

²⁶Leka pereka pinyolo, penu kuimirira munthu unango mangawache;

²⁷ngakhala hunakwanisa kupipagali tayu, talimbako makayo inapokoserwa, mwenemo iwe uli dedede penepo.

²⁸Leka bulusa chidzindikiro chakale cha madire chidaikha makolo ako chile.

²⁹Ayi ukumuona munthu waluso pabasache? Iye anati afiliviri mafumu; iye nkhabe dzatumikira anthu ene pyawo tayu.