Read cisena MIYAMBI 23 Bible Online

MIYAMBI 23 - cisena bible

MIYAMBI 23

¹Ungakhala pansi kudya na mtongi, yang'ana mwadidi pyakudya pili pamaso pakopo,

²ngakhala ndiwe nyalidyo pikhondese wekha ene kudya mwamtima.

³Leka jojera mata pyakudya pyache pyakupasa mabapyo, thangwi pyakudyapyo ntchiphamaso.

⁴Leka kupitopesa wekha ene na kusaka mfuma; khala wanzeru pontho wakupithunda.

⁵Unaiona mfumako ikwenda kabodzi kene, podi iyo inakhala ninga yamera maphaphido, mbimbulukira kuthambo ninga mphamba.

⁶Leka kudya pyakudya pya nyakuumirwa, leka jojera mata pyakudya pyache pyakupasa mabapyo;

⁷thangwi iye ndi mtundu wa munthu, ule ndzidzi onsene ambanyerezera pya pinthu pyavunga iye. Iye ambakutchitcha kuti, “Idya pontho imwa,” kwache iye hakupifuna kuti pikhale tenepo tayu.

⁸Iwe unatapika na pinkiti pene pyadya iwepyo, pontho mafalako akumkomesa nawo anaenda papezi.

⁹Leka longa na pupwe, thangwi iye analulupisa mafalako anzeruwo.

¹⁰Leka bulusa chidzindikiro chakale cha madire a miyala, penu kunumpha madire kwenda kumunda wa ana masiye,

¹¹thangwi Dombo wawo ngwamphamvu; iye anaatchinjiriza pamseru wawo kupokanyisana nawe.

¹²Ikha mtimako pana upangizi, pontho ikha makutu kuna mafala audziwisi.

¹³Leka khonda langa mwanako; ngakhala unamtchunyusa na mtswamu, iye nkhabe dzafa tayu.

¹⁴Mtchunyuse na mtswamu, mbupulumuse moyo wache kuimfa.

¹⁵Mwananga, ngakhala ndiwe wanzeru penepo mtimanga unakomerwa;

¹⁶moyo wanga unasekera, ngakhala mulomo wako unalonga pyakulungama.

¹⁷Mtimako mbuleke sirira anyakudawika, mbwenye ndzidzi onsene chita phinga kugopa MBUYA.

¹⁸Tenepo ndimomwene kuti iwe una chidikhiro, pontho chidikhiro chako nkhabe dzamalira panjira tayu.

¹⁹Mwananga, vesera, mbukhale wanzeru; fambisa mtimako m'njira yakulungama.

²⁰Leka phatizana na anyakumwa vinyu pyakwanga, penu kukhala pakati pa anyakudya nyama mwauphanga,

²¹thangwi madombe na anthu alidyo ambasanduka akutcherenga; kuvesera manungo kumbaachitisa kufamba yapiyapi.

²²Vesera pinalonga babako, adakuonesa kunja ule, pontho leka lulupisa mako pa unkhalambache.

²³Gula pyakuonadi mbukhonde kupigulisa; gumana nzeru, upangizi, pontho kuvesa pinthu.

²⁴Babache nyakulungama ambakomerwa pikulu pene; munthu ule ana mwanache wanzeru ambafamba na nthuku phaa!

²⁵Babako na mako ene mbakomerwe; nyakukubala mbasekere.

²⁶Mwananga, ngandipase mtimako, pontho maso ako mbakhale pana njira zanga,

²⁷thangwi puta akhala ninga mulindi, pontho mkazi wakushashalika akhala ninga dzenje ya matope.

²⁸Iye ambabisala swiswiswi ninga phanga, mbachitisa amuna azinji kusanduka okhonda khulupirika.

²⁹Nyadzedze mbani? Mbani nyakutsukwala? Nyamapoko-poko mbani? Mbani nyakudungunya? Mbani nyapironda pyakukhonda dziwika madzero ache? Nyachirope mbani?

³⁰Enewa ngale ambamera mitsitsi pana vinyu, pontho ale ambamwa vinyu wakuvungazwa-vungazwa.

³¹Leka kwatika na upiriwiri wa vinyu, leka tunduka na kungondomuka kwache m'khomitchoko, pontho leka nyengeka na kukhudyulika kwache.

³²Pakumalisira pache ambaluma ninga nyoka, pontho ngwakupha ninga nyongo ya mbobo.

³³Maso ako anaona mayezi-yezi, pontho msolo wako nkhabe dzaphata basa tayu.

³⁴Unakhala ninga munthu, ule ali gadaa pakati na nyanza zikulu-zikulu, ule ali gonee padomu ya mwadiya.

³⁵Iwe unalonga kuti, “Iwo adanditinthimula, kwache ine sidakuwazike tayu! Iwo adandilikita, kwache ine nkhabe kuva kupha tayu! Ayi kunja kunachena lini, towera ndikagumane pyakuledzeresa pinango?”