Read cisena MIYAMBI 24 Bible Online

MIYAMBI 24 - cisena bible

MIYAMBI 24

¹Leka sirira anyakudawika, leka sirira gulu yawo;

²thangwi kwawo nkhusasanya kuchita nthonga basi, pontho milomo yawo imbalonga pya kudzesa kwene nyatwa basi.

³Nyumba imbamangwa na nzeru, pontho iyo imbakhazikika na udziwisi,

⁴na udziwisi masubi ache ambadzala phamu-phamu na pinthu pyadidi pontho pyakudula.

⁵Nzeru zimbapita mphamvu, pontho nyaudziwisi ambathimizira mboko zache;[14]

⁶thangwi kamenya nkhondo kumbafunika uphungu wadidi, pontho kukunda kwagona pa mapungu azinji.

⁷Pupwe nkhabe fikira nzeru tayu; iye nkhabe chakulonga pamgumano pathando.

⁸Nyakusasanya kuchita pyakuipa, ambathulwa mpeni walezi.

⁹Pinthu pimbasasanya pupwe kupichita mphyakudawa, pontho nyakusingirira, anthu ambanyansirwa naye.

¹⁰Ngakhala unataya mtima ndzidzi wanyatwa, penepo iwe mphamvu zako nsakuchepa.

¹¹Pulumusa anyakukwatwa kwenda kaphiwa; khala dombo wa anyakudzedzereka kwenda kachekwa.

¹²Ngakhala munalonga kuti, “Ife nkhabe kupidziwa tayu,” ayi iye nyakuyesa mtima penepi nkhabe kupiona tayu? Ayi iye nyakukoya moyo wanu nkhabe kupidziwa tayu? Ayi iye nkhabe dzabwezera munthu onsene malingana na mabasache tayu?

¹³Mwananga, idya manyuchi, thangwi ngadidi; manyuchi akubulukira m'dembedza ngakutapira kualawira.

¹⁴Wathema kudziwa kuti nzeru nsakutapira kuna moyo wako; ngakhala unazigumana, penepo pinthu pyako pinakufambira mwadidi, pontho chidikhiro chako nkhabe dzamalira panjira tayu.

¹⁵Leka bisala swiswiswi ninga phanga kunja kwa nyumba ya nyakulungama; leka chita pyauphanga pamsuwo pache.

¹⁶Thangwi nyakulungama podi agwe pyache kanomwe, iye ambalamuka basi ndranji mbwenye nyatwa zimbagwisa yokoto anyakudawika.

¹⁷Leka sekera ngakhala nyamalwako analimbuka; iye angagwegweduka, mtimako mbuleke komerwa,

¹⁸thangwi MBUYA anapiona mbaipirwa napyo, mbaleka kumzhangalira.

¹⁹Leka sanyika mtima na munthu wakuipa, penu kusirira nyakudawika,

²⁰thangwi nyakuipa nkhabe chidikhiro tayu, pontho nyale ya nyakudawika inafyokotoka.

²¹Mwananga, gopa MBUYA pontho mfumu; leka phatizana na anyakupandukira,

²²thangwi MBUYA na mfumu ndiye anafuna dzagwisa nyatwa zakututumusa pana iwo, pontho mbani anadziwa mtundu wa nyatwa unafuna iwo kuagwisira.

²³Ipi mphifunziso pinango pya nzeru: Kutonga mwakuyang'ana nkhope si pyadidi tayu:

²⁴Munthu analonga kuna anyakudawa kuti, “Imwe hamudadawe tayu,” weneyo anthu anati amtemberere, pontho madzinza a anthu anati amkhonde.

²⁵Mbwenye kuna anyakutchunyusa anyakudawa pinthu pyawo pinaafambira mwadidi, pontho iwo anatambira mtsanzayiso.

²⁶Munthu wakutawira mwakuona ndiye ambaonesa ushamwali chadi-chadi.

²⁷Malisa mabasako onsene akumunda, ungamala penepo manga nyumbako.

²⁸Leka chitira tsanthembako umboni wapezi, penu kuphatisa basa mulomo wako kulonga nawo pyakunama.

²⁹Leka longa kuti, “Ine ndinati ndichite kuna iye ninga pyontho pyandichita iyembo;” ine ndinati ndimbwezere, thangwi ya pinthu pyandichita iye.

³⁰Ine ndidagwanda na m'munda mwa nyakupolola, na m'munda wamfesa wa nyakukhonda vesa pinthu;

³¹minga yamala mera ponsene pene, nyakhanche ali kavu-kavu m'munda monsenemo, pontho mpandache wamiyala wamala gomoka.

³²Pidaona ine ndidatoma kupinyerezera, ine ndidafunzapo chinthu chinango:

³³kugona pang'ono, kuodzira pang'ono, kufunya manja pang'ono kupuma,

³⁴penepo utcherengi unakufikira ninga mbava, pontho usiwa unabwera ninga phanga.