Read cisena MIYAMBI 25 Bible Online

MIYAMBI 25 - cisena bible

MIYAMBI 25

¹Ishi ndi miyambi inango ya Solomoni, ile idalembwa pontho na amuna a Hezekia mfumu wa Yuda:

²Timbalemedza Mulungu thangwi ya pinthu pyakubisika; mbwenye timbalemedza mafumu thangwi ya kusakanyula pinthu pyakubisika.

³Ninga kulapha kwachita kudzulu, pontho kuzwika kwachita dziko yapansi sasawambo manyerezero a mafumu nkhabe dziwika tayu.

⁴Bulusa siliva masepu-sepu, towera misiri akwanise kusasanya naye pyombo;

⁵bulusa anyakudawika pamaso pa mfumu, tenepo mpando wache unakhazikika na chilungamo.

⁶Leka kupikuza wekha ene pamaso pa mfumu, penu kupisakira wekha ene mbuto pakati pa amuna akuveka;

⁷mphyadidi akupange kuti, “Dzakhale padidipa,” kusiyana na kuti akululupise pamaso pa anyakulemedzwa. Pinthu pyaona iwe na maso ako,

⁸leka thamanga napyo kuthando ya miseru; apo pakumalisira pache unachita tani ngakhala tsanthembako anakuchitisa manyadzo?

⁹Ngakhala una mseru na tsanthembako wathema kukhala naye pansi; leka pitisa mphepo pyakubisika pya munthu unango,

¹⁰thangwi nyakuveserayo anakwanisa kukuchitisa manyadzo, tenepo yako inakhala mbiri yakuipa ndzidzi onsene.

¹¹Fala yakuthema yakulongwa pandzidzi wache yakhala ninga pyakuthemesera pyagolidi m'pyakuikhiramo pyasiliva.

¹²Kuvesera uphungu wa munthu wanzeru kwakhala ninga mphete yagolidi, penu mkufu wagolidi chadi-chadi.

¹³Kunyindirika kwa nyamphangwa kuna anyakumtuma kwakhala ninga madzi akutonthola ndzidzi wa malimwe; iye ambasisimusa moyo wa ambuyache.

¹⁴Nyakugaya pya mitukwa imbakhonda iye pereka ile, akhala ninga makole pontho mphepo yakukhonda dzesa mvula.

¹⁵Kupirira ndiye kumbakhuludza mtongi, pontho lulume yakufulika inakwanisa kufewesa mtima wamwala.

¹⁶Ngakhala unagumana manyuchi, idya mbukhutise mimbako, kuadya azinji ene unamalisira tapika nawo.

¹⁷Leka chita chinyalo kumsuwo kwa tsanthembako, gopesera anamalisira topa nawe mbakuzonda.

¹⁸Nyakulongera tsanthembache umboni wakunama akhala ninga chigomba, talasada, penu tswimo ya twetwetwe.

¹⁹Kunyindira nyakukhonda khulupirika pandzidzi wa nyatwa kwakhala ninga dzino yakupha, penu mwendo wakulamala.

²⁰Kuimbira nyimbo nyakutsukwala kwakhala ninga kumdula nguwo ndzidzi wakutonthola, penu kuikha chinyayi pachironda pache.

²¹Ngakhala nyamalwako ana njala, mpase pyakudya kuti abwezembo mata; ngakhala iye akuva nyota mpase madzi kuti afewesembo kukhosi.

²²Ungachita tenepo iye anagwa nkhope, pontho MBUYA anakufupa.

²³Tsweda imbadzesa ukali ninga mumbachitirambo mbalu kudzesa mvula.

²⁴Mphyadidi kukhala mwakufinyizika kunkhomo kwa nsoyi, kusiyana na kukhala m'nyumba na mkazi wamulomo.

²⁵Mphangwa zadidi zakubulukira kudziko yakutali zakhala ninga madzi anonono kuna munthu wanyota.

²⁶Nyakulungama ule ambafewa kuna munthu wakuipa ndi sasawa na mphuno ya madzi a matope penu mchera wakuipa.

²⁷Si pyadidi tayu kudya manyuchi azinji penu kufuna kusimbwa ndzidzi onsene.

²⁸Nyakukhonda kuuphata mtima akhala ninga mzinda ule mafufu ache amala kugwa.