Read cisena MIYAMBI 26 Bible Online

MIYAMBI 26 - cisena bible

MIYAMBI 26

¹Ninga madzi nkhabe phatana ndzidzi wa malimwe, penu mvula kuvumba ndzidzi wakuvuna, sasawambo chilemedzo nkhabe themera pupwe tayu.

²Ninga nyankapa-kapa wakumbuluka-mbuluka, penu nyanzeze okhonda phama kupuma ndi sasawa na kutembererwa kwakusowa nako mathangwi nkhabe kukufikira tayu.

³Mtswamu ngwakukwapula nawo kavalo, pontho chisimbi kukanwa kwa bulu ntchakumuongolera nacho, sasawambo ndodo njakumenya nayo kumsana kwa pupwe.

⁴Leka tawira pupwe malingana na kupupwa kwache, gopesera unakhalambo pupwe.

⁵Tawira pupwe kumuonesa kupupwa kwachita iye, gopesera iye anapiyesa wanzeru.

⁶Kutuma pupwe na mphangwa kwakhala ninga kupigwanda wekha ene manyalo, penu kupichemerera wekha ene nyatwa.

⁷Miyambi ya m'kanwa mwa pupwe yakhala ninga miyendo ya nyakulamala.

⁸Kulemedza pupwe kwakhala ninga kumangirira mwala kubishika.

⁹Miyambi ya m'kanwa mwa pupwe yakhala ninga tsanjo ya minga m'manja mwa nyakuledzera.

¹⁰Nyakulemba basa pupwe penu nyakugwanda kwene pyache na njira ndi sasawa na kuponya mivi nyamponya-mponya kulasa anthu onsene.

¹¹Mwanambwa wakudya pontho matapiko ache ndi sasawa na pupwe wakuchita nyambwereza pyakupupwa.

¹²Pupwe ule ambalongwa kuti ndi pupweletu ana chidikhiro kusiyana na nyakupiikhamo yekha ene kuti ngwanzeru.

¹³Mpololi ambalonga kuti, “Kumsewuku kuna nkhalamu! Nkhalamu yakugoswa ikuzungulira-zungulira m'njira!”

¹⁴Mpololi ambafukunyuka-fukunyuka patalimba pache ninga montho mumbachitira msuwo kufunyika mwakuphatanizira mwache.

¹⁵Mpololi angamenya tchuwa, iye nkhabe kwanisa na kuifikisa kwene pamulomo pache tayu.

¹⁶Mpololi ambapiyesa ninga wanzeru kupiringana amuna anomwe ale anakwanisa kutawira mwakuchenjera.

¹⁷Nyakugwanda kwene pyache na njira ule ambapitira mphoka ya anango akhala ninga nyakukweya mwanambwa makutu.

¹⁸Ninga nyakupenga ule ambaponya pyache kwene nsakali zamoto penu matswimo akugoswa,

¹⁹ndi sasawa na nyakunyengeza tsanthembache, m'nduli mwache mbalonga mbati, “Ndikhalonga kwene dzendanga!”

²⁰Pakusowa nkhuni, moto umbafyokota; pakusowa tsweda, nkhabe lamuka nthonga tayu.

²¹Ninga makala pamoto wacheeve, penu nkhuni pamoto wanganda-nganda ndi sasawa na munthu wakuzunguzika kulamusa mapoko-poko.

²²Tsweda imbakoma pyakwanga ninga chitumbuwa, anthu ambakomerwadi na kuikhudyula.

²³Kutapira m'kanwa kunakwanisa kubisa mtima wakuipa ninga montho mumbachitira mphampha kugudumira chikalango.

²⁴Nyakuipirwa ambalonga pyadidi na pakanwa pache mwenemo mumtima mwache chizondi chili phamu-phamu.

²⁵Podi kwene kuti mafalache akhale akutapira tani, leka kumkhulupira, thangwi pyakunyansa pya mtundu onsene pili ndendende mumtima mwache.

²⁶Kuipirwa kwache ambakubisa mwaunthawatawa, kwache kudawika kwache kunaoniwa pakwecha na anthu onsene.

²⁷Ngakhala munthu anakumba dzenje, iye ene maka anati agweremo; ngakhala munthu anagulung'undisa mwala, unati ufinyize iye maka.

²⁸Nyakunama ambazonda anthu adakuwaza iye ale, pontho nyakutapira m'kanwa ngwakuvunga.