Read cisena MIYAMBI 27 Bible Online

MIYAMBI 27 - cisena bible

MIYAMBI 27

¹Leka nyadira pya mangwana, podi iwe nkhabe dziwa tayu kuti mangwana kunagwanji tayu.

²Lekera anthu anango pyawo kukusimba, nee kupisimba wekha ene tayu; munthu unango ene pyache wa apo, nee iwe ene mwenechiroache tayu.

³Mwala ngwakulemera, pontho tchetcha ndiye yanyanyiratu, mbwenye makani a pupwe ndiye apita kupiringana pyonsene piwiripi.

⁴Kuzhangali kumbadzesa kukala mtima, pontho ukali ngwakugoswa, kwache bivu ndiye motoletu.

⁵Kusumulula munthu maso na maso nkhuonesa kumfuna kwako.

⁶Mphyadidi kukuwazwa na shamwaliako kusiyana na kumpsompsonwa na nyamalwako.

⁷Nyakukhuta nkhabe chikhumbo na uchi tayu, mbwenye kuna nyanjala podi na chinthu chakuwawa chene ambachiva kutapira basi.

⁸Ninga mbalame yakwenda kutali na chisa chache ndi sasawa na nyakwenda kutali na musache.

⁹Mafuta akununkhira na pyakufukiza pyakununkhira pimbachitisa mtima kukomerwa, mbwenye udidi wa shamwali wagona pa uphungu wache.

¹⁰Leka taya shamwaliako penu shamwaliache babako, pontho leka kwenda kumusa kwa mbaleako mwenemo uli panyatwa. Mphyadidi kwenda kuna tsanthembako wachifupiletu kusiyana na mbaleako wakutali na iwe.

¹¹Mwananga khala wanzeru, tenepo unachitisa mtimanga kukomerwa; penepo ndinakwanisa kutawira anyakundilulupisa.

¹²Nyakuchenjera angaona pyakugoswa ambabisala, mbwenye pupwe ambaenda konthoko mbakaonako nyatwa.

¹³Kwata mkhanjo wa nyakuimirira mlendo mangawache; mbachikhale pinyolo ngakhala iye anapichitira nyakudza pyache.

¹⁴Nyakubesera kamutsa tsanthembache mwakugaluza fala kunja kuli nonono, anayeswa ninga akumtemberera.

¹⁵Mkazi wamulomo akhala ninga nsoyi yakuchucha ndzidzi wa mvula;

¹⁶kuyesera kummatamisa kwakhala ninga kuyesa kumatamisa mphepo, penu kufumbata mafuta.

¹⁷Ninga mumbanozwera simbi kwa simbi, sasawambo munthu ambanozwa manyerezero a mwanzache.

¹⁸Nyakutsalakana muti wamkuyu anati adye nsapo zache, nyakuyang'anira mwadidi mbuyache anati atambire chilemedzo.

¹⁹Ninga mumbachitira nkhope ya munthu kuonekera m'madzi sasawambo makhaliro a munthu ambaonesa mtimache.

²⁰Dziko ya anyakufa na masiye nkhabe khuta tayu, sasawambo maso a munthu nkhabe khuta tayu.

²¹Siliva na golidi pimbanyunguluswa na moto kubulusa masepu-sepu, sasawambo munthu ambayeswa na kusimbwa kumbachitwa iye.

²²Podi kwene usinje pupwe m'banda kumpeya ninga mapira, iwe nkhabe kwanisa kumtchumbutula upupwe wachewo tayu.

²³Onesesa mwadidi kuti wadziwa mabirako akukhala tani, pontho yang'anira mwadidi mikumbi ya pifuyo pyako;

²⁴thangwi mfuma nkhabe khala kwenda na kwenda tayu, pontho ufumu nkhabe fika mifendu yonsene tayu.

²⁵Maudzu angamala gwandwa, mfuli zimbaphwitha, pontho angamala tuta maudzu kuabulusa m'phiri,

²⁶anabira anakupasa ubweya wakusasanyira nguwo, pontho mbuzi zinakupasa konta ya kobiri zakugula nayo munda.

²⁷Mkaka wa mbuzi unakhala nawo nadza-nadza kudyesa iwepo na banjako ene, pontho kunenepesa anyabasako achitsikana.