Read cisena MIYAMBI 29 Bible Online

MIYAMBI 29 - cisena bible

MIYAMBI 29

¹Nyakuumisa mtima angasumululwa kazinji kene anati avungwe mwakututumusa okhonda verwa nsisi.

²Anyakulungama angatonga, anthu ambakomerwambo; mbwenye anyakudawika angatonga, anthu ambabulira.

³Nyakufuna nzeru ambachitisa babache kukomerwa, mbwenye shamwali wa maputa ambasakaza mfumache.

⁴Chilungamo chimbachitisa dziko kumera mitsitsi, mbwenye nyamtima na kudyekerwa ambaifudza dziko.

⁵Nyakutapira m'kanwa kuna tsanthembache, kunachita iye nkhumteyera msampha.

⁶Nyakuipa ambakweshwa na pyakudawa pyache, mbwenye nyakulungama ambaimba mbakomerwa.

⁷Anyakulungama ambachitira chilungamo anyakutcherenga, mbwenye anyakudawika nkhabe kuatsalakana tayu.

⁸Anyakusingirira ambalamusa chimpiningu mumzinda, mbwenye anthu anzeru ambamalisa ukali.

⁹Ngakhala munthu wanzeru zache anasumira pupwe, pupwe ambazhangali mbatikana pyache, tenepo pambutopo pambasowa mtendere.

¹⁰Nyachirope ambazonda munthu wakuona mtima; mbwenye anyakulungama ambatchinjiriza moyo wache.[15]

¹¹Pupwe ambaonesa shungu yache yonsene, mbwenye nyakulungama ambauphata mtima.

¹²Ngakhala mtongi anavesera pyakunama, mathubu ache onsene ambasanduka akuipa.

¹³Nyakutcherenga na nyakupondereza ntchibodzi-bodzi pachinthu ichi: MBUYA ambapereka maso kuna onsene awiriwa.

¹⁴Ngakhala mfumu anatonga anyakutcherenga mwakukhonda yang'ana nkhope, ufumu wache unakhala pakupata kwenda na kwenda.

¹⁵Kumtchunyusa na mtswamu kumbamfunzisa nzeru, mbwenye mwana wakukulira pachinena ambachitisa mache manyadzo.

¹⁶Nyakudawika angatonga, kudawambo kumbakhala pabasache, kwache anyakulungama anaaona kugwa kwa anthu enewa.

¹⁷Langa mwanako, tenepo iye nkhabe dzakupasa kwadoka tayu; iye anachitisa moyo wako kukomerwa.

¹⁸Pale nkhabe mphangwa zakubulukira kuna Mulungu, anthu ndiye ambasanduka ching'aung'au; mbwenye nyakutsanzaya ngule ambakoya mwambo wa MBUYA.

¹⁹Nyabasa nkhabe sumululwa na pakanwa pokha tayu; podi kwene kuti iye apivese, kwache iye nkhabe kupichita tayu.

²⁰Ayi ukumuona munthu wakulonga mwamchunju? Pupwe ana chidikhiro kusiyana na iye.

²¹Ngakhala munthu anapasa nyabasache utumbe kutomera uwanache, pakumalisira pache iye anasala manja m'khosi nama.[16]

²²Munthu wakuzhangali ambalamusa mapoko-poko, pontho anyachipsu ambachita pyaumambala pizinji pene.

²³Kutumbama kwa munthu kumbamtchithisa pansi, mbwenye nyakupichepesa ambatambira chilemedzo.

²⁴Nyakufamba na mbava nkhabe funa moyo wache tayu; podi kwene kuti adumbiriswe, iye nkhabe bweka umambalache tayu.

²⁵Kugopa anthu kwakhala ninga msampha, mbwenye nyakunyindira MBUYA ambakhala pakupata.

²⁶Anthu azinji ambapifuna kukomerwa mtima na mtongi, mbwenye munthu ambagumana chilungamo kuna MBUYA kwene basi.

²⁷Anyakulungama ambanyansirwa na anyakusowa chilungamo; anyakuipa ambanyansirwambo na anyakulungama.