Read cisena MIYAMBI 3 Bible Online

MIYAMBI 3 - cisena bible

MIYAMBI 3

¹Mwananga, leka duwalira pifunziso pyanga, ndzidzi onsene koya mumtima mwako matongero akupasa ine.

²Chifunziso changa chinakuchitisa kukhala na moyo wakulapha; pontho chinachitisa pinthu pyako kufamba mwadidi.

³Leka tawirisa kukhulupirika na kufunana kubuluka muna iwe; pimangirire m'khosi mwako, pilembe mumtima mwako.

⁴Tenepo unakomerwa mtima mbukhala na mbiri yadidi pamaso pa Mulungu na anthu ene.

⁵Nyindira MBUYA na mtimako onsene, leka nyindira udziwisi wako ene.

⁶Pyonsene pinachita iwe kumbuka MBUYA, tenepo iye anakuonesa njira yakuongoka.

⁷Leka kupiyesa wekha ene nyanzeru; mbwenye gopa MBUYA mbuthunde pyakuipa.

⁸Ungachita tenepo ipyo pinakhala ninga mtombwe kuwangisa manungo ako, pontho kupasa mphamvu magogodo ako.

⁹Lemedza MBUYA na mfumako, pereka nsembe kuna iye mbewu zako zakutoma kutokota.

¹⁰Penepo pikwa pyako pinadzala phamu-phamu, pontho maphiso ako anagabikira na vinyu.

¹¹Mwananga, MBUYA angakulanga, leka pinda, pontho leka swirizwa iye angakusumulula.

¹²Thangwi MBUYA ambasumulula anthu ambafuna iye ale, ninga baba kusumulula mwanache wapamtima.

¹³Ngwakutsanzaya munthu ule ambagumana nzeru, ule ambagumana udziwisi.

¹⁴Kukhala na nzeru nkhwakuganyali pyakwanga kupiringana siliva; nkhwakudula pyakwanga kupiringana golidi.

¹⁵Nzeru nsakufunika pyakwanga kupiringana miyala yakudula; iwe nkhabe kwanisa kusangiza nzeru na chinthu chinango tayu.

¹⁶Nzeru zimbapasa moyo wakulapha na dzanjache ya madyo; pontho na dzanjache ya mabzere zimbapasa mfuma na chilemedzo.

¹⁷Nzeru zinakwanisa kuchitisa moyo wako kukomerwa, mbizikutsogolera m'njira zamtendere.

¹⁸Nzeru zakhala ninga muti wakupasa moyo kuna anyakuziphatisa; ngakutsanzaya ale ambakhumbatira nzeru.

¹⁹MBUYA adaikha maziko a dziko yapansi na nzeru zache; na udziwisi wache iye adaikha thambo m'mbuto mwache.

²⁰Na nzeru zache iye ambachitisa madzi kutumbuka kubulukira pansi, pontho makole kuvumbisa mvula.

²¹Mwananga, khala nyanzeru pontho nyakutonga pinthu mwadidi; leka tawira kuti pikuthawire.

²²Penepi pinakupasa moyo, mbipikhala ninga mkufu wakubalika m'khosi mwako.

²³Tenepo unakwanisa kufamba pyako okhonda gopa, pontho iwe nkhabe dzagwegweduka tayu.

²⁴Ndzidzi unaenda iwe kagona hunachita mantha tayu; chitulo chako chinakhala tapi-tapi.

²⁵Leka tekeseka na nyatwa zakugwa mwakututumusa, penu kuvungika kule kumbakunda anyakuipa.

²⁶Thangwi MBUYA anakhala chinyindiro chako; iye nkhabe dzatawirisa tayu kuti manyalo ako akweshwe na msampha.

²⁷Ndzidzi onsene ninga munapikwanisira iwe, chita udidi kuna ale athema kuchitirwa udidiwo.

²⁸Leka panga tsanthembako kuti, “Bwera ndzidzi unango; ndinati ndikupase mangwana,” mwenemo chinthucho uli nacho penepo pene.

²⁹Leka sasanya kuchitira tsanthembako pyakuipa, ule ambakhala m'khundu mwako kunyindira iwepo.

³⁰Leka pokanyisana na munthu unango okhonda na thangwi ene, ngakhala iye hadachite pinthu pyakukuvesa kupha tayu.

³¹Leka sirira munthu wanthonga, penu kutewerawambo njira zache,

³²thangwi MBUYA ambanyansirwa na munthu wa makhaliro akupotoka, mbwenye anyakulungama mbashamwali ache.

³³MBUYA ambatemberera misa ya anyakudawa, mbwenye misa ya anyakulungama iye ambaitsanzayisa.

³⁴Anyakusingirira iye ambaasedegula, mbwenye ambakomera mtima anyakupichepesa,

³⁵Anthu anzeru anakhala na mbiri yadidi, mbwenye mapupwe anachitiswa manyadzo.