Read cisena MIYAMBI 30 Bible Online

MIYAMBI 30 - cisena bible

MIYAMBI 30

¹Pifunziso pya Aguri mwana Yake wa ku Masa: Mulungu, ine ndatopa! Mulungu, ine ndatopa, pontho ine ndalenduka.

²Ine ndine pupweletu kupiringana anango onsene, ine nkhabe udziwisi ninga una anthu tayu.

³Ine sidafunze nzeru tayu, penu kukhala na udziwisi wa Nyakuchenayo tayu.

⁴Aendako kudzuluko mbani mbabwerako pontho? Mbani agumanyisa mphepo m'thavu mwache? Apo mbani adakukutiza madzi m'khambza mwache? Akhazikisa madolomero a dziko yapansi mbani? Ayi dzinache mbani, pontho dzina ya mwanache mbani? Ngandipange ngakhala unapidziwa!

⁵Mafala onsene a Mulungu ngakunyindirika; iye ntchakugedera matswimo kuna anyakubisala muna iye ale.

⁶Leka thimizira pamafalache, gopesera iye anakubwanyula mbuoneka nyakunama.

⁷MBUYA ndinakupemphani pinthu piwiri; lekani kundikhondera mbandidzati kufa:

⁸Thamangisani unthawatawa na kunama kutali na ine; lekani kundipasa nee utcherengi, penu mfuma, mbwenye mundipase kwene kudya kwa nsiku na nsiku.

⁹Thangwi ndingakhala napyo pizinji ndinakwanisa kukuduwalirani mbandilonga kuti, “MBUYA mbani?” Ndingakhala nyakutcherenga ndinaba, penepo ndinalulupisa dzina ya Mulungu wanga.

¹⁰Leka pangirira nyabasa kuna mbuyache, gopesera iye anakutemberera mbuoneswa nyatwa.

¹¹Pana anango ambatemberera ababawo mbakhonda tsanzayisa amawo;

¹²ale ambapiyesa adidi m'maso mwawo, kwache m'bwalo mwawo mwamala dzala na pyakunyansa;

¹³ale ambatumbama pyakwanga, mbapiyesa ninga anthu a m'mudzi mwa anthu;

¹⁴anthu ale mano awo ali jentchenene ninga talasada, ale nsabwada zawo zina mipeni pika-pika kuti akhudyule anyakutcherenga padziko yapansi, pontho anyakusowa pakutsamira pakati pa anthu.

¹⁵Usundu una ana awiri achikazi. Iwo akulira kuti, “Ngatipaseni changana, ngatipaseni changana.” Pana pinthu pitatu pile nkhabe khuta tayu, pinthu pinayi pile ndzidzi onsene nkhabe longa tayu kuti, “Takhuta!”

¹⁶Dziko ya anyakufa, nthumbo yakuuma, mataka okhonda kwana na madzi, pontho moto ule nkhabe longa tayu kuti, “Ndakhuta!”

¹⁷Nyakuseka babache pontho nyakululupisa[17] mache, anakonombolwa maso na makhungubwe a m'phedi mbadyiwa na malezi.

¹⁸Pana pinthu pitatu pile pimbandimala nzeru pyakwanga, pinthu pinayi pile pimbandinensa pyakwanga kupivesa:

¹⁹kumbuluka kwa miphamba kudzuluku, kufamba kwa nyoka pamwala, kubeluka kwa mwadiya ukulu pabara, pontho kufunana kumbachita mphale na mwali.

²⁰Umu ndiye mumbachitira puta: iye ambadya mbakupusa mulomo wache, kubuluka penepo ambalonga kuti, “Ine sidadawe tayu.”

²¹Pana pinthu pitatu pile pimbachitisa dziko yapansi kutetemera na mantha, pinthu pinayi pile nkhabe kwanisa kupipirira tayu:

²²bitchu wakusanduka mfumu, pupwe wakukhala na phoso mataka ene,

²³mkazi wa makhaliro akuipa angasembwa, pontho nyabasa wachikazi angapokosera mbuyache banja.

²⁴Pana pinthu pinayi ping'ono-ping'ono padziko yapansi, kwache mphyanzeru pyakwanga:

²⁵nyerere mphyakulengwa pyakuchepa mphamvu, kwache zimbakoyeratu pyakudya pyawo m'malimwe;

²⁶mbira nkhanyama kakuchepa mphamvu, kwache zimbamanga nyumba zawo m'maphanzwi;

²⁷nyadzombe nkhabe mfumu tayu, kwache ambafamba pamulikiti m'magulu-magulu;

²⁸nyankalibunyu anakwanisa kuphatwa na manja, kwache ambagumanwa m'nyumba za mafumu.

²⁹Pana pinthu pitatu pile pimbafamba tang'atang'a; pana pinthu pinayi pile pimbafamba na nthuku phaa:

³⁰nkhalamu ile ina mphamvu pyakwanga pakati pa nyama, pontho ile nkhabe thawa chinthu na chibodzi chene tayu;

³¹dzongwe, na bokho, pontho mfumu wakufamba na anyankhondo ache yungaa.

³²Ngakhala udatoma khala pupwe, pontho kupisimba wekha ene, penu udatoma wasasanya kuchita pyakuipa, toma khala fulike mbuphate phutu.

³³Thangwi mkaka ungadenkhera, mafuta amkaka ambaoneka padzulu pache, pontho ungafinya mphuno chiropa chimbabuluka, sasawambo kulamusa ukali mamalisiro ache ndi nthonga basi.