Read cisena MIYAMBI 31 Bible Online

MIYAMBI 31 - cisena bible

MIYAMBI 31

¹Ipi mphifunziso pya Mfumu Lemuele wa ku Masa, pile pidamfunzisambo mache:

²“Mwananga, mwana wakubuluka m'mimba mwanga, mwananga adapaswa ine thangwi ya kupemphera kwanga, ngandivesere:

³leka malira akazi mphamvu zako, mboko zako na akazi ambavunga mafumu ale.

⁴“Lemuele, mfumu hadatheme tayu kupapila pyakuledzeresa, atongi nee pidaathemere tayu kukhala na chikalo cha bwadwa,

⁵gopesera analedzera mbaduwalira matongero a dziko, mbapotoza ufulu wa anyakuponderezwa onsene.

⁶Pasa bwadwawo kuna anyakutayika; pereka vinyu kuna nyakusanyika mtima.

⁷Aleke amwe mbaduwalira utcherengi wawo; nyatwa zawo mbaleke kuzikumbukave.

⁸“Longa m'mbuto mwa ale nkhabe kwanisa longa okha ene; ikhira kunduli anyakusowa na pakuphata pene kuna anyakuasumira.

⁹Longa pontho tonga miseru mwachilungamo; ikhira kunduli anthu akutcherenga na anyakusowa ene.”

¹⁰Ayi mbani agumana mkazi wa makhaliro adidi? Iye ngwakufunika kupiringana miyala yakudula.

¹¹Mamunache anakwanisa kumnyindira, tenepo mamunayo nkhabe dzasowa pinthu tayu.

¹²Nsiku zonsene za moyo wache, mkaziyo nkhabe kumdzesera nyatwa tayu, mbwenye pyadidi pene basi.

¹³Mkaziyo ambaenda mbasaka ubweya wa mabira na thonje, mbawangisa kuphata basa na manjache.

¹⁴Iye akhala ninga miyadiya mikulu-mikulu ya anyamalonda wakupidzesera yekha ene phoso kubulukira kumadziko akutali.

¹⁵Iye ambalamuka kunja kuli mbuu; iye ambasasanyira banjache pyakudya mbagawira anyabasache achitsikana basa.

¹⁶Iye ambanyerezera pya kugula munda mbauguladi; iye ambalima munda wamfesa na kobiri zakupha yekha na manjache.

¹⁷Iye ngwakuwangisa pabasa; iye nkhabe khala makhono mburuu tayu angaphata basa.

¹⁸Iye ambaonesesa kuti malonda ache akuganyali nawo, pontho nyale yache nkhabe thima tayu na mosiku.

¹⁹Iye ambapilukira yekha ene thonje, mbapisasanyira yekha ene nguwo.

²⁰Iye ngwakufewa manja kuna anyakutcherenga mbafuthula manja kuna anyakusowa.

²¹Kunja kungatonthola, iye nkhabe swipa mtima na banjache tayu, thangwi onsenewo ana pyakuvala pyakukhumba.

²²Iye ambasasanya nguwo zakugonera patalimba; iye ambavala nguwo zakufewa pontho zakukoma m'maso.

²³Mamunache ambadziwika na anthu azinji, pontho ambalemedzwa pakati pa mathando a anthu.

²⁴Iye ambasasanya nguwo zakufewa mbazigulisa, pontho anyamalonda, iye ambaagulisira pitambaya.

²⁵Mphamvu na chilemedzo pimbakhala ninga pyakuvala pyache, anganyerezera pya m'tsogolo kukhosi kwache kumbakhala mbee.

²⁶Iye ambalonga mwanzeru; mbapereka uphungu wadidi kuna anthu anango.

²⁷Iye ambafambisa pinthu pya panyumba pache, pontho iye nkhabe khala kwene manja mbwee tayu.

²⁸Anache ambamnyadira mbamchemera nyakutsanzaya; mamunache ambachitambo chibodzi-bodzi, mbamsimba mbati:

²⁹“Alipo akazi azinji, ale ana makhaliro adidi, kwache iwembo waapita onsenewo.”

³⁰Nkhope yamchena imbaphata anthu m'maso, pontho kubalika kwa nkhope kumbamala; mbwenye mkazi ule ambagopa MBUYA athema kusimbwa.

³¹Iye athema kutambira mfupo, thangwi ya mabasache, pontho mabasache mbalemedzwe nawo pakwecha.