Read cisena MIYAMBI 4 Bible Online

MIYAMBI 4 - cisena bible

MIYAMBI 4

¹Ananga, veserani pifunziso pya babanu; ikhani khutu, tenepo munakhala akuvesa pinthu.

²Pifunziso pinakupasani inepi mphyadidi, natenepo lekani kupikhonda.

³Pikhali ine mphale m'nyumba mwa babanga, mwenemo ndili mwana wapamtima, mwana mbodzi ene basi wa mama,

⁴babanga akhandifunzisa. Iye akhandipanga kuti, “Phatisa mafalanga na mtimako onsene; chita ninga munakupangira ine, tenepo unakhala na moyo.

⁵Kwata nzeru na udziwisi! Leka duwalira, penu kukhonda mafalanga.

⁶Leka pasa nkhodolo nzeru, tenepo zinakutchinjiriza; zifune, tenepo zinakuyang'anira mwadidi.

⁷Papyonsene nzeru nsakufunikaletu; podi kwene kuti uvunge pyonsene pina iwe, khala na nzeru pontho udziwisi.

⁸Ikha mtima pana nzeru, tenepo zinakukwiza; khumbatira nzeru, tenepo zinakupasa chilemedzo.

⁹Izo zinakhala ninga kamdedzi mumsolo mwako, pontho zinakuvazika chipewu chachifumu chademelero.”

¹⁰Ndivesere mwananga. Leka chita mphwayo na pinakupanga inepi, tenepo iwe unakhala na moyo wakulapha.

¹¹Ine ndakufunzisa njira za nzeru, pontho ndakutsogolera kunjira zakuongoka.

¹²Iwe ungafamba, nkhabe chinthu chinafuna kukutchinga tayu; iwe ungathamanga, nkhabe dzagwegweduka tayu.

¹³Ndzidzi onsene phatisa upangizi, leka tawirisa kukuthawira; utchinjirize, thangwi moyo wako wagona penepo.

¹⁴Leka ponda njira za anyakudawika, penu kufamba na njira za anthu akuipa.

¹⁵Zithunde mbuleka famba na njira zawo, buluka kweneko mbulokote njira yakombo.

¹⁶Anthu akudawika nkhabe kwanisa kugona angakhonda chita chinthu chakuipa tayu; iwo nkhabe ona chitulo tayu angakhonda gwisa munthu.

¹⁷Kuchita pyakudawika nkhudya kwawo, pontho kuchita nthonga nkhumwa kwawo.

¹⁸Njira imbafamba na anyakulungama imbakhala ninga kubuluka kwa dzuwa, kumbaenda mbakuchena kufikirana masikati.

¹⁹Mbwenye njira ya anyakudawika yakhala ninga mdima wa ndiwe ani, iwo nkhabe dziwa chinthu chaagwegwedusacho tayu.

²⁰Mwananga, ikha khutu kuna pinalonga ine; vesera mwadidi mafalangawa.

²¹Leka tawirisa kuti penepi pikubulukire, pontho piikhe mumtima mwako.

²²Iwo ambapasa moyo kuna anyakuagumana, pontho moyo wamphamvu kuna manungo ako onsene.

²³Chita mphole-mphole na kunyerezera kwako; thangwi mtimako ndi phata ya moyo.

²⁴Leka longa mafala akupotoka; leka longa pyakunama.

²⁵Ikha maso ako patsogolo, pontho leka chewuka chewuka.

²⁶Chita mphole-mphole na munaponda iwemo, tenepo pinthu pyako pinakufambira mwadidi.

²⁷Leka baukira kumadyo penu kumabzere; manyalo ako mbathunde njira zakuipa.