Read cisena MIYAMBI 5 Bible Online

MIYAMBI 5 - cisena bible

MIYAMBI 5

¹Mwananga, vesera mwadidi nzeru zanga, pontho ikha khutu kuna uphungu,

²towera ukhale nyakutonga pinthu mwadidi, pontho pakanwa pako nkhabe dzasowa mafala anzeru.

³Milomo ya puta imbajoja manyuchi, pontho mafalache ngakufewa ninga mafuta,

⁴mbwenye mamalisiro ache iye ambawawa ninga nyongo, pontho ambakhala ninga talasada yakutwa.

⁵Manyalo ache ayang'ana kuimfa; njira imbafamba na iye njakwenda kudziko ya anyakufa.

⁶Njira yakwendera kumoyo iye nkhabe nayo pinthu tayu; njira zache nsakupotoka potoka, kwache iye nkhabe dzindikira tayu.

⁷Chinchino ndivesereni ananga, pontho lekani chita mphwayo na pinalonga inepi.

⁸Thundani mkazi ninga weneyu! Lekani na kwenda kwene chifupi na msuwo wache,

⁹gopesera munataya chilemedzo kuna anthu anango, pontho kuvunga uphaleanu kuna anthu akukala mtima.

¹⁰Ande, alendo anakwata mfumanu yonsene; pyonsene pyabulusira imwe kaluma pinafumisa munthu unango.

¹¹Mamalisiro a moyo wanu anakhala kubulira, uku manungo anu na minofu yanu pyamala pakatika.

¹²Penepo iwe unalonga kuti, “Ndidakhonderanji ine kuva kulangwa? Ndidakhonderanji ine kuva kusumululwa?

¹³Mapungu anga nee ndikhaayesa ninga pinthu tayu, penu kuikha khutu kuna anyakundipanga nzeru tayu.

¹⁴Tenepo lero ndikhadasala kwene nenene kuti ndivungike pamaso pa anthu onsene.”

¹⁵Imwa madzi akubulukira mumchera mwako mwene, khala wakukhulupirika kuna mkazako.

¹⁶Thangwi yache ninji umwe madzi akufamba pyawo m'misewu? Pontho kuti uchite apa unaponda apa unaponda?

¹⁷Madzi ako mbakhale onthowo, mbukhonda kumwa madzi a mumchera wa mwinji.

¹⁸Mcherako mbutsanzayiswe; komerwa na mkazako adakazhali na iwe,

¹⁹wakubalika ninga nyasa, pontho wakukoma m'maso ninga mphalapala. Mabele ache mbakutopole mtima ndzidzi onsene; mbuthimize kumangika na kukufuna kwache.

²⁰Thangwi yache ninji utunduke na puta, mwananga? Watani unakhumbatira mkazi wa munthu unango?

²¹Thangwi pamaso pa MBUYA mabasa onsene a munthu ali nyimwa, pontho maso ache ambakhala konsene kunaenda iye.

²²Umambala wa nyakudawika ndi msampha kuna mwenechiroache; mabasache akudawika ambamkwidzinga ninga nkhambala.

²³Iye anati afe thangwi ya kukhonda kupithunda, pontho na thangwi ya kupupwa kwache kukulu iye anatayika.