Read cisena MIYAMBI 6 Bible Online

MIYAMBI 6 - cisena bible

MIYAMBI 6

¹Mwananga, ngakhala unaimirira tsanthembako mangawache, penu ngakhala unapereka pinyolo m'mbuto mwa mlendo;

²ngakhala unakweshwa na pinthu pidadumbira iwe, penu unaphatwa na mafala akubuluka m'kanwa mwako;

³penepo, mwananga, iwe uli m'manja mwa munthu unango, mbwenye umu ndiye munafunira iwe kubulukiramo: chimbiza ndoko wekha ene kuna tsanthembakoyo mbumdembetere kuti akusudzule!

⁴Maso ako mbaleke ona chitulo, leka na kuodzira kwene.

⁵Vumbuka ninga mphalapala kuthawa nyakukhulisa, somphola mumsamphamo ninga mbalame.

⁶Funza kubulukira kuna nyerere, nyakupololawe; nyerezera pya makhaliro ache mbukhale wanzeru.

⁷Izo nkhabe mfumu tayu, nee mtongi penu mkadamu tayu,

⁸kwache izo zimbakoyeratu phoso yawo m'malimwe, pontho zimbatutiratu pyakudya pyawo ndzidzi wakuvuna.

⁹Nyakupololawe, unavesera manungo kufikirana lini? Ayi unalamuka lini patalimbapo?

¹⁰Iwe umbalonga kuti, “Ndichite kwene seya, pontho kuodzira kwene pang'ono basi, ndinafunya manjangawa ndipume pang'ono pene.”

¹¹Kwache utcherengi unakufikira ninga mbava, pontho usiwa ninga phanga.

¹²Nyakusowa basa, nyakudawika, ambaenda pyache na kulonga pyakunama,

¹³ambakunyula maso ache, mbapereka chidziwiso na manyalo ache, pontho mbakodola na pyala pyache.

¹⁴Na manyerezero akupotoka iye ambasasanya pyakuipa, pontho ndzidzi onsene kwache nkhumenyanisa anthu misolo.

¹⁵Natenepo nyatwa inamgwera kabodzi na kabodzi; vumbu-vumbu iye anavungwa mbasaliratu penu-penu.

¹⁶Pana pinthu pitanthatu pile MBUYA ambapizonda, pinthu pinomwe pile mphyakunyansa m'maso mwache:

¹⁷maso akunyada, kunama, manja akuchuchisa chiropa cha anyakukhonda dawa,

¹⁸mtima wakusasanya kuchita pyakuipa, manyalo akuchimbiza kuthamanga kachita pyakudawika,

¹⁹mboni wakulonga mdungulu wa pyakunama, pontho nyakumenyanisa abale misolo.

²⁰Mwananga, koya matongero a babako, pontho leka khonda pifunziso pya mako.

²¹Afungire mumtima mwako kwenda na kwenda; apyangirire m'khosi mwako,

²²Iwo anakuonesa njira ndzidzi unafamba iwe; kukutchinjiriza ungagona na mosiku; ungalamuka analonga nawe.

²³Thangwi matongerowa akhala ninga nyale, chifunzisochi chakhala ninga cheza, pontho kusumululwa na malango ndi njira za kumoyo,

²⁴kukuchitisa kuthunda mkazi wakuzuda, pontho kuna mafala akutapira a mkazi wakudzedzeduka.

²⁵Leka tenuka mtima na kubalika kwacheko; penu kutopoka na maso ache akuyengerera.

²⁶Kugona na puta unakwanisa kuvunga kwene mkate ubodzi basi, mbwenye kugona na mkazi wakusembwa unavunga podi na moyo wako ene.

²⁷Ayi munthu anakwanisa kupalira moto pamiyendo pache, nguwo zache okhonda kupya?

²⁸Ayi munthu anakwanisa kuponda makala a moto okhonda pisika manyalo ache?

²⁹Ndi sasawa na munthu ule anagona na mkazi wa munthu unango; munthu onsene anamkhuyayo nkhabe dzasiyiwa kwene okhonda tchunyuswa tayu.

³⁰Ayi anthu nkhabe selusa mbava tayu, iye angaba kufuna kukhutisa kwene mimbache.[2]

³¹Ande, angaphatwa, iye athema kupagali pyakuinjipa kupiringana kanomwe kubwezera pidaba iye pile; iye athema kupereka pyonsene pya m'nyumba mwache.

³²Munthu anachita uputayo nkhabe nzeru tayu; kunachita iyeko nkhupivunga kwene yekha ene.

³³Pironda na kuseluswa ndiye pimbatambira iye, pontho manyadzo nkhabe dzammalira tayu;

³⁴thangwi ntchanje ya mamunache imbalamusa ukali, tenepo iye angabwezera, anachita kulumira mano.

³⁵Iye nkhabe dzava kupepeswa tayu; mitukwa izinji ene nkhabe kwanisa kumalisa shungu yacheyo tayu.