Read cisena MIYAMBI 7 Bible Online

MIYAMBI 7 - cisena bible

MIYAMBI 7

¹Mwananga, koya mafalanga pontho koya mumtima mwako matongero anga.

²Teweza matongero anga, tenepo unakhala na moyo; yang'anira mwadidi pifunziso pyanga ninga ukuyang'anira mboni ya diso yako.

³Pivale m'chala chako; pilembe mumtima mwako.

⁴Ulonge kuna nzeru kuti, “Ndiwe nyamainganga,” pontho udziwisi uuyese mbaleako;

⁵ipyo pinakuphedza kuthunda maputa, pontho mkazi okhonda khulupirika na mafalache akushashalika.

⁶Na pazhanera ya nyumbanga, nsiku inango ndikhayang'ana kunja.

⁷Ndidaona aphale azinji okhonda dziwa pinthu, mbwenye pakati pawo ndidaonapo mbodzi wakupupwa.

⁸Iye akhafamba mumsewu chifupi na nyumba ya mkaziyo mbathamula miyendo kwendera kumsuwo kwache,

⁹m'chidodo, kunja kuli bii, mwenemo mdima wagwa.

¹⁰Tenepo mkaziyo adabuluka panja kagumanikana naye, wakuvala ninga puta kufuna kumkwesha.

¹¹Iye ngwakulonga-longa ninga tchotcho, wamulomo, pontho matako ache nkhabe khala pansi tayu;

¹²lero ali mumsewu, khazi-khazi unamuona pamsika, kudikhira kukwesha amuna m'mphambano zonsene za njira.

¹³Iye adaphata mphaleyo mbadyesana naye milomo, mwenemo kunkhope kuli puju, iye adalonga mbati,

¹⁴“Ndapereka nsembe yachiphatizano kumusa lero; pidadumbira ine pile lero ndapichitisa kukwana-kwana.

¹⁵Tenepo ndabuluka panja pano dzagumanikana nawe; ine ndikhakusaka-saka, tenepo ndakugumana!

¹⁶Talimbanga ndamala kithasika kale, na nguwo zakufewa zamaluwa za kudziko ya Iguputo.

¹⁷Ndawazirapo mafuta amure, pontho ndawazirapo pyakununkhira pya aloena kinamoni.

¹⁸Tende! Tigwe maya mpakana kunja mbee; tikomerwe pyakwanga na mtututu wa kukhumbatirana.

¹⁹Kumusaku mamunanga nkhabeko; aenda paulendo kutali pyakwanga.

²⁰Iye adakwata kobiri zizinji; iye anabwererako mwezi ungapita kuchidima.”

²¹Tenepo iye adatunduka na mafalache akutapira ale; iye adanyengeka na mafalache akushashalika ale.

²²Sindzidzi iye adenda naye ninga ng'ombe kwenda kachekwa, ninga mbala kwenda kakweshwa na msampha,

²³kule tswimo inalasa matumbo ache. Iye akhala ninga mbalame kwenda mumsampha; nkhabe kupidziwa tayu kuti moyo wache ukhali pamoto.

²⁴Chinchino, mwananga, ndivesere; ikha khutu kuna chifunziso changa.

²⁵Leka kwatika na mkazi ninga weneyu, leka kwenda chimpune-mpune kumtewera.

²⁶Iye avunga mdungulu ene wa amuna; amuna apha iye ngazinji ene.

²⁷Musache ndi msewu ukulu wa kudziko ya anyakufa, wakubidira kumasubi a imfa.