Read cisena MIYAMBI 8 Bible Online

MIYAMBI 8 - cisena bible

MIYAMBI 8

¹Ngavesera! Nzeru zikuchemera. Udziwisi ukupichitisa okha ene kuveka.

²Pansonga ya phiri chifupi na njira, pontho na m'mphambano iye akuimira.

³Pamsuwo wakupitira mumzinda, pamsuwo iye akuchemera mbati,

⁴“Kuna imwe anthu, ndikukuchemerani; ndikuchemera anthu onsene padziko yapansi.

⁵Imwe okhonda khwima, khalani anyakutonga pinthu mwadidi. Imwe mapupwe, chinchino khalani na nzeru.

⁶Veserani mafalanga akufunikawa; ine ndafungula mulomo wanga kuti ndilonge pyakulungama.

⁷Pinalonga inepi mphyakuona; kunama ndimbakuzonda pyakwanga.

⁸Pyonsene pimbalonga ine mphyakuona, thangwi mulomo wanga nkhabe longa mafala akupotoka tayu.

⁹Kuna nyakuvesa pinthu mafalanga ngadidi; ngakuthema kuna ale ana udziwisi.

¹⁰Sankhulani uphungu wanga m'mbuto mwa siliva; sankhulani nzeru nee golidi chadi-chadi tayu,

¹¹thangwi nzeru njakufunika kupiringana miyala yakudula; chinthu chinakhumba imwecho nkhabe kwanisa kuchisangiza na nzeru tayu.

¹²“Ine nzeru, ndimbafambirana na kuvesa pinthu; ine ndina udziwisi pontho ndine nyakutonga pinthu mwadidi.

¹³Kugopa MBUYA nkhuzonda pyakuipa; ndimbazonda kugaya na kutumbama, makhaliro akuipa pontho mafala akupotoka.

¹⁴Ine ndimbapereka uphungu, pontho ndine nyakupikwanisa, ndina udziwisi pontho mphamvu.

¹⁵Na ine mafumu ambakwanisa kutonga, pontho atongi ambakwanisa kusasanya matongero adidi.

¹⁶Na ine akadamu ambakwanisa kutonga; mathubu ambakwanisa kufambisa dziko.

¹⁷Ine ndimbafunambo anyakundifuna ale; anyakundisaka-sakawo ambandigumana.

¹⁸Mfuma na chilemedzo pili m'manja mwanga, pontho ufumi okhonda mala na kufamba mwadidi kwa pinthu.

¹⁹Pinthu pimbagumanwa muna ine mphyadidi kupiringana golidi; mphyakufunika pyakwanga kupiringana siliva.

²⁰Njira zimbafamba ine nsakulungama; njira zimbatewera ine nsa chilungamo.

²¹Ndimbapereka mfuma kuna anyakundifuna, mbandidzaza pikwa pyawo na ufumi.

²²“Pakutoma papyonsene MBUYA adalenga ine pano, nthomatoma ya basache yakale.

²³Na kale ene ine ndidasasanywa, pakutomaletu dziko mbidzati lengwa.

²⁴Ine ndidabalwa bara mbidzati lengwa, mbakudzati khala mphuno za madzi;

²⁵mwenemo mapiri mbadzati ikhwa m'mbuto mwawo, pontho pitunda mbapidzati lengwa ine ndidabalwa kale,

²⁶Mulungu mbadzati lenga dziko yapansi na mindache, podi na mataka ene.

²⁷Ndikhalipo kale ndzidzi udakhazikisa iye thambo m'mbuto mwache, pikhaikha iye madire a bara yakuzwika,

²⁸pidaikha iye makole a kuthambo pidafungula iye mphuno za madzi pansi pa bara,

²⁹pidaikha iye madire a bara mbatonga madzi kuti aleke numpha madirewo, pontho pidaikha iye maziko a dziko yapansi.

³⁰Ndikhali m'khundu mwache ninga misiriache,[3] iye akhakomerwa nane nsiku na nsiku, pontho ine ndikhasekera ndzidzi onsene pamaso pache,

³¹kusekera na dziko yache yonsene, pontho kukomerwa na anthu adasasanya iye ale.

³²“Chinchino, ananga, ndivesereni; ngakutsanzaya anthu ale ambatewera njira zanga.

³³Veserani uphungu wanga, tenepo munakhala anzeru; lekani kuukhonda.

³⁴Ngwakutsanzaya munthu ambandivesera ule, ule ambakhala pamsuwo panga nsiku zonsene, kudikhira pamsuwo pamusa panga.

³⁵Thangwi nyakundigumanayo agumana moyo, pontho MBUYA anamkomera mtima.

³⁶Mbwenye anyakukhonda kundigumanayo akupikuwaza okha ene; anyakundizonda onsene ambafuna imfa.”