Read cisena MIYAMBI 9 Bible Online

MIYAMBI 9 - cisena bible

MIYAMBI 9

¹Nzeru amanga nyumbache mbaimisa nsanamira zinomwe.

²Iye adapha nyama kuchita phwando, mbavungaza-vungaza vinyu wache; iye amala kuipiikha kale pathebulu.

³Iye atuma anyabasache kachemera anthu, kubulukira na pambuto zakukwira muluwani akuchemera mbati,

⁴“Anthu okhonda dziwa pinthu bwerani kuno!” Iye akulonga kuna anyakusowa nzeru mbati,

⁵“Bwerani, idyani pyakudya pyangapi, pontho mwani vinyu avungaza ineyu.

⁶Bulukani pakati pa anthu okhonda dziwa pinthu, tenepo munakhala na moyo; fambani na njira ya udziwisi.

⁷“Munthu ule anasumulula nyakusingirira, ambapichemerera yekha ene kutikanwa; ule anasumulula munthu wakuipa, ambapichitisa yekha kukuwazika.

⁸Leka sumulula nyakusingirira, gopesera anakuzonda, mbwenye sumulula munthu wanzeru, iye anakufuna.

⁹Pereka uphungu kuna munthu wanzeru, tenepo anathimizira nzeru zache; funzisa munthu wakulungama, tenepo anathimizira udziwisi wache.

¹⁰“Nthomatoma ya nzeru nkhugopa MBUYA, pontho kukhala na udziwisi nkhudziwa Nyakuchena ule,

¹¹thangwi kudzera muna ine nsiku za moyo wako zinainjipa pontho pyaka pyako pinathimizirika.

¹²Ngakhala una nzeru anafuna dzaganyali ndiwepo; mbwenye ngakhala unailulupisa ndiwepo anafuna dzaona nyatwa.”

¹³Pupwe akhala ninga mkazi wamulomo, okhonda tsalakana pinthu, pontho wakusowa manyadzo.

¹⁴Iye ambakhala pamsuwo wa nyumbache, pontho pampando pambuto yakukwira ya luwani,

¹⁵kuchemera anthu akugwanda pyawo, ale akufambira mathangwi awo mbati,

¹⁶“Imwe anthu okhonda dziwa pinthu, pitani muno!” Kuna anyakusowa nzeru iye ambalonga kuti,

¹⁷“Madzi akuba ambakoma pyakwanga; mkate wakudya chibiso-biso umbatapira.”

¹⁸Iwo nkhabe kupidziwa tayu kuti anyakwendako ambafa, kuti anyakuchemerwawo apita kale kudzenje yakuzwika ya dziko ya anyakufa.