Read cisena NYAKULALIKA 1 Bible Online

NYAKULALIKA 1 - cisena bible

NYAKULALIKA 1

¹Mafala enewa mba Nyakulalika mwanache Davite, ule akhali mfumu mumzinda wa Yerusalemu:

²Nyakulalika adalonga mbati, “Mphyapezi-pezi! Mphyapezi-pezi! Pyonsene mphyapezi-pezi!”

³Munthu ambaganyalinji na mabasache onsene, mabasa ambaphata iye mwakuwangisa pansi pa thambo?

⁴Mifendu imbadza, mifendu imbamala, mbwenye dziko yapansi imbakhalapo kwenda na kwenda.

⁵Dzuwa imbabuluka, dzuwa imbathobila, mbithamanga kubwerera kudabulukira iyo kule.

⁶Mphepo imbadima kwenda kumwera mbizungunuka kwenda kumpoto, mbizungulira-zungulira kubwerera kudabulukira iyo.

⁷Mikulo yonsene imbakuka kagwera m'bara, kwache bara nkhabe dzala tayu. Madzi ambabwerera kule kudatomera mikulo, mbatoma pontho kukuka.

⁸Pinthu pyonsene mphyakutopesa: munthu nkhabe kwanisa kupilonga kwache. Maso nkhabe kwanisa kupiona pyonsenepyo; makutu nkhabe kwanisa kupiva pyonsenepyo tayu.

⁹Pinthu pikhalipo kale pinati pikhalepo pontho. Pinthu pyachitika kale pinai pichitike pontho. Pansi pa thambo nkhabepo chinthu na chibodzi chene chachinchino.

¹⁰Ayi pana chinthu chinango chile chinakwanisa munthu kulonga kuti, “Yang'ana! Ichi ntchachinchino.” Nkhabe, pyonsene pikhalipo kale ife mbatidzati balwa.

¹¹Nkhabe na mbodzi ene ambakumbuka pinthu pidachitika m'nduli tayu; m'tsogolo muno munthu nkhabe dzakumbuka pinthu pimbachitika lero, penu mangwana tayu.

¹²Ine, Nyakulalika, ndikhakhalira mu Yerusalemu kutonga dziko ya Israele.

¹³Na nzeru zanga zonsene ndidachita phinga kufuna kufunza na kudziwa pinthu pyonsene pimbachitika padziko ya pansi pano. Yeneyi ndi mitolo yakulemera yaikha Mulungu pana anthu.

¹⁴Ndaona pyonsene pile pimbachitwa pansi pa thambo: pyonsene mphyapezi-pezi, nkhulemba m'madzi.

¹⁵Chinthu chakugongonyeka nkhabe kwanisa kudzongolwa tayu; chinthu chakusowapo nkhabe kwanisa kulengeswa tayu.

¹⁶Ndidalonga ndekha ene kuti, “Ine ndakula na nzeru kupiringana munthu onsene adatonga Yerusalemu ine mbandidzati. Ine ndimbadziwa chadi-chadi kuti nzeru pontho udziwisi pikulonga kuti tani.”

¹⁷Ndidachita phinga kufuna kuvesa kusiyana kwachita nzeru na kupupwa, kusiyana kwa udziwisi na nsala. Mbwenye ndidagumana kuti penepi pontho nkhulemba m'madzi.

¹⁸Thangwi kukhala na nzeru zizinji, kumbadzesambo mdungulu wa kutsukwala: kukhala na udziwisi kumbachitisa kusanyika mtima pikulu pene.