Read cisena NYAKULALIKA 10 Bible Online

NYAKULALIKA 10 - cisena bible

NYAKULALIKA 10

¹Ntchentche zakufa zinakwanisa kuchitisa mafuta akununkhira kukhala na khwema yakuipa, pontho chakupupwa ching'ono ng'ono chinakwanisa kuipisa nzeru na chilemedzo.

²Manyerezero a munthu wanzeru ambazungunukira kumadyo, mbwenye manyerezero a pupwe ambazungunukira kumabzere.

³Podi kwene iye afambe m'njira, pupwe nkhabe nzeru tayu, mbaonesa kuna munthu onsene kupupwa kwachita iye.

⁴Ngakhala mbuyako akuzhangalira, leka kusiya basako; kufulika[4] kunakwanisa kuchitisa anthu kulekererwa umambala wakugoswa.

⁵Pana chakuipa chinango chaona ine pansi pa thambo, kuphophonya kumbachita atongi:

⁶Mapupwe ambapaswa chidzo chikulu, mwenemo anyakufuma ambapaswa chidzo ching'ono.

⁷Ine ndaona mabitchu kupakira akavalo, mwenemo mathubu akufamba pansi ninga mabitchu.

⁸Munthu onsene anakumba mulindi, anati agweremo ndiye ene; munthu onsene anaswa mpanda, nyoka inati imulume.

⁹Munthu ule ana basa yakuswa miyala, miyalayo inakwanisa kumkuwaza; nyakupandula pigo anakwanisa kupheka yekha ene.

¹⁰Ngakhala mbadzo yafondoka mbikhonda nozwa, panafunika mphamvu zizinji, mbwenye nyaluso ambadziwa machitiro ache kuti apikwanise.

¹¹Ngakhala nyamatsenga analumwa na nyoka zache, penepo iye apita mphepo.

¹²Mafala a m'kanwa mwa nyanzeru ambampasa chilemedzo, mbwenye pupwe ambavungika na mafalache onthowo.

¹³Pakutoma mafalache ambakhala akupupwa; pakumalisira pache ambakhala aunyansala.

¹⁴Pupwe ambainjipisa pyakulonga. Nkhabe munthu ambadziwa pinthu pinafuna kudza, pontho mbani anakwanisa kumpanga pinthu pinafuna dzachitika m'tsogolo.

¹⁵Basa imbaphata pupwe imbamtopesa; iye nkhabe dziwa na njira ene yakwendera kumusa kwache tayu.

¹⁶Dzedze kuna dziko ile mfumu wache akhali bitchu,[5] pontho ile mathubu ache ambadya phwando machibese onsene.

¹⁷Mbwenye njakutsanzaya dziko ile mfumu wache ndi mwana mtumbe, pontho mathubu ache ambadya pandzidzi wache, towera agumane mphamvu nee kuti aledzere tayu.

¹⁸Ngakhala munthu ngwakupolola, nsoyi yache inamala bwanyuka; ngakhala iye ambakhala kwene manja mbwee, nyumbache inati ichuche.

¹⁹Maphwando ngakuchitisa munthu kukomerwa, pontho vinyu ngwakuchitisa munthu kugalamuka, kwache pyonsene pimbalira kobiri.

²⁰Leka tikana mfumu podi na m'manyerezero mwako mwene, penu kutikana nyakufuma kutalimba kwako, thangwi mbalame inakwanisa kukwata mafalako, penu chakumbuluka chinango chene chinakwanisa kalonga pyalonga iwepyo.