Read cisena NYAKULALIKA 11 Bible Online

NYAKULALIKA 11 - cisena bible

NYAKULALIKA 11

¹Phatisa basa kobiri zako kuchita nazo malonda, thangwi pangagwanda nsiku zizinji zene unaganyali nazo.

²Ikha kobiri zako m'mbuto za malonda zinomwe penu zisere, thangwi iwe nkhabe dziwa kuti ndi dzedze ya mtundu wanji inafuna kukugwera padziko yapansi.

³Ngakhala makole adzala madzi, iwo ambavumbisa mvula padziko yapansi. Podi muti ugwere pyawo kumwera penu kumpoto, unati ugonere kukhundu kwagwera iwoko basi.

⁴Nyakuyang'ana mphepo nkhabe dzabzala tayu; nyakuyang'ana makole nkhabe dzavuna tayu.

⁵Ninga montho mumbakhonda iwe dziwa mule mumbapitira mzimu mwa mwana pinasasanywa iye m'mimba mwa mache, sasawambo iwe nkhabe kwanisa kuvesa tayu mabasa a Mulungu, Nyakusasanya pinthu pyonsene.

⁶Bzala mbewu zako na machibese, pontho na mawulo leka khala kwene manja mbwee, thangwi iwe nkhabe dziwa tayu kuti njipi inafuna kukuganyalisa, mwinango zonsene ziwirizo unaganyali nazo.

⁷Cheza ntchadidi, pontho maso ambakomerwa na kuona dzuwa.

⁸Podi munthu akhale pyache na moyo pyaka pizinji pene tani, iye mbakomerwe pyache na pyaka pyonsenepyo. Mbwenye mbakumbuke kuti nsiku zache za mdima zinakhala zizinji pyakwanga. Pyonsene pinafuna kudza mphyapezi-pezi.

⁹Imwe achiphale komerwani na uphaleanu; mitimanu mbikomerwe pansiku za uphaleanu. Tewezani pinthu pinakhumba mtimanu, pontho na pyonsene pinaona maso anu, kwache kumbukani kuti Mulungu anakutongani mseru thangwi ya pyonsene pyachita imwe.

¹⁰Natenepo bulusani pyakutsukwalisa pyonsene mumtima mwanu, pontho thundani pyonsene pinakunensani m'manungo mwanu, thangwi uphale na uwana ngwapezi-pezi.