Read cisena NYAKULALIKA 12 Bible Online

NYAKULALIKA 12 - cisena bible

NYAKULALIKA 12

¹Kumbukani Nyakukulengani[6] pansiku za uphaleanu, nsiku za nyatwa mbizidzati fika, pontho pyaka mbipidzati fika, pile pinafuna imwe dzalonga kuti, “Ine nkhabe komerwa na moyo tayu;”

²cheza cha dzuwa, mwezi pontho nyenyezi mbipidzati thima, pontho makole mbadzati bwerera mvula ingamala vumba;

³ndzidzi ule unafuna mikono yanu yakuwanga dzatetemera, pontho miyendo yanu yamphamvu dzagoboka, ndzidzi unafuna dzaleka majiri anu kutafuna, thangwi iwo ngakuchepa, pontho unafuna dzachita maso anu nkhunguwisi;

⁴ndzidzi unafuna dzafungwa misuwo yakuyang'ana kunjira, pontho kumala kwa dungu ya kupeya; ndzidzi ule unafuna imwe dzalamuka bzobzo, thangwi ya kulira kwa mbalame, mbwenye nyimbo zawo zonsene zinambombowa;

⁵ndzidzi unafuna imwe dzagopa mbuto zakulapha na kugoswa kwa misewu; ndzidzi unafuna tsisi yanu dzasanduka imvi, pontho kufamba dzasanduka kukambadza mwakuti chikhumbo mbichidzamaliratu. Munthu onsene athema kwenda kumusa kwache kwakukhala na kukhala, tenepo anyakuasintili anazungulira-zungulira m'misewu.

⁶Mkumbukeni Nyakukulengani, nkhambala yasiliva mbidzati thumbusuka, penu ndilo yagolidi mbidzati sweka; mulinga mbudzati bwededzeka pamchera, penu mthephu mbudzati sweka pamchera,

⁷pontho fumbi mbidzati bwerera kufumbi kudabulukira iyo, pontho mzimu mbudzati bwerera kuna Mulungu adaupereka ule.

⁸Nyakulalika adalonga mbati, “Mphyapezi-pezi! Pyonsene mphyapezi-pezi!”

⁹Na thangwi yakuti Nyakulalika akhali na nzeru pyakwanga iye adafunzisambo nzeruzo anthu anango. Iye akhapinyerezera mwadidi kusaka-saka na kupiikha mwadidi panyandandandache miyambi mizinji.

¹⁰Nyakulalika adasankhula mafala akuphata mtima, ale akhali akulungama pontho akuona.

¹¹Mafala a munthu wanzeru akhala ninga ndodo yakusongoka pontho miyambi idagumanyisa iye ninga mapedego akukhomerwa pafufu, adapaswa iye na Mulungu, Makabuswa mbodzi ene basi.

¹²Mwananga ndikukucheuza papyonsene pinafuna thimizwa pa penepi. Kulemba mabukhu nkhabe madolomero tayu, pontho kufunza pyakwanga kumbatopesa manungo.

¹³Chinchino pyonsene pyaveka; mafala akumalisa nawo papinthu penepi mbawa: Gopa Mulungu, pontho vera matongero ache, thangwi munthu adalengerwa basa yeneyi.

¹⁴Thangwi Mulungu anati atonge chinthu chonsene chinachita ife, kuthimizapo pyonsene pimbachitwa chibiso-biso, chadidi penu chakuipa.