Read cisena NYAKULALIKA 3 Bible Online

NYAKULALIKA 3 - cisena bible

NYAKULALIKA 3

¹Chinthu chonsene chimbachitika pansi pa thambo chile, chimbachitika pandzidzi wache:

²pana ndzidzi wakubalwa pontho ndzidzi wakufa, pana ndzidzi wakubzala pontho ndzidzi wakudula,

³pana ndzidzi wakupha pontho ndzidzi wakuwangisa, pana ndzidzi wakugwisa pontho ndzidzi wakumanga,

⁴pana ndzidzi wakulira pontho ndzidzi wakuseka, pana ndzidzi wakusintili pontho ndzidzi wakuvina,

⁵pana ndzidzi wakumwaza miyala pontho ndzidzi wakuigumanya, pana ndzidzi wakukhumbatirana pontho ndzidzi wakuthundana,

⁶pana ndzidzi wakugumana pinthu pontho ndzidzi wakutaya pinthu, pana ndzidzi wakukoya pinthu pontho ndzidzi wa bazawaza,

⁷pana ndzidzi wakung'amba pontho ndzidzi wakusona, pana ndzidzi wakumatama pontho ndzidzi wakulonga,

⁸pana ndzidzi wakufunana pontho ndzidzi wa chizondi, pana ndzidzi wa nkhondo pontho ndzidzi wa mtendere.

⁹Ayi nyakuphata basa ambaganyaliponji na mabasache onsene akuwanga?

¹⁰Ndaona mitolo yakulemera yaikha Mulungu pana anthu.

¹¹Iye aikha ndzidzi wakuthema papinthu pyonsene. Iye atipasa manyerezero akufuna kudziwa pya m'nduli na pya m'tsogolo, kwache munthu nkhabe kukwanisa kuvesa pinthu pimbachita iye kubulukira pakutoma kufikirana pakumalisira tayu.

¹²Ndimbapidziwa kuti nkhabe chadidi chinakwanisa munthu kuchita kupiringana kusekera na kukomerwa pyache ndzidzi una iye na moyo.

¹³Ande, munthu onsene athema kudya na kumwa pyache pontho kukomerwa na mabasache onsene akuwanga, thangwi penepi ndi mtukwa wa Mulungu.

¹⁴Ndimbapidziwa kuti pinthu pimbachita Mulungu pimbakhalapo kwenda na kwenda; nkhabe na chinthu chene chinakwanisa kuthimizirwa penu kubuluswa pana ipyo tayu. Mulungu ambachita tenepo, towera anthu amgope.

¹⁵Chinthu chonsene chilipo lero chikhalipo kale, pontho chonsene chinafuna dzakhalapo chikhalipo kale; Mulungu ambachitisa pinthu pya m'nduli kuchitika pontho.

¹⁶Ndidaona pontho chinthu chinango pansi pa thambo: Pale padathema khala chilungamo pana pyakudawika, pontho pale padathema khala pyakulungama pana pyakudawika.

¹⁷Ine ndidalonga ndekha ene kuti, “Mulungu anati atonge anyakulungama na anyakudawika, thangwi iye aikha ndzidzi wa chonsene chakuchitika, pontho ndzidzi wa basa yonsene.”

¹⁸Ndidalonga mumtima mwanga kuti, “Kulonga pya anthu, Mulungu akuayesa, towera aaonese kuti akhala ninga nyama.

¹⁹Mamalisiro a munthu na nyama ngabodzi ene: munthu ambafa, nyama imbafambo. Onsene uwiriawo ana muya ubodzi ene; munthu nkhabe piringana nyama tayu. Pyonsene mphyapezi-pezi.

²⁰Onsene uwiriawo ambaenda kumbuto ibodzi ene; onsenewa adabulukira kufumbi; tenepo onsene anabwerera kufumbiko.

²¹Mbani anapidziwa ngakhala mzimu wa munthu umbaenda kudzulu, pontho ngakhala mzimu wa nyama umbaenda kumataka?”

²²Tenepo ndidapiona kuti nkhabe chinthu chadidi kuna munthu kupiringana kukomerwa pyache na pinthu pyaphatira iye basa, thangwi penepyo ndiye pyakumthemera.[1] Thangwi mbani anakwanisa kudziwa chinthu chinafuna dzamchitikira iye angafa.