Read cisena NYAKULALIKA 4 Bible Online

NYAKULALIKA 4 - cisena bible

NYAKULALIKA 4

¹Ndidayang'ana pontho mbandiona kuponderezana konsene kukhachitika pansi pa thambo: Ine ndidaona misozi ya anyakuponderezwa, pontho pakhali nkhabe nyakuathondoza; thangwi anyakuapondereza akhali na mphamvu zizinji, pontho pakhasowa nyakuathondoza.

²Ine ndidanyerezera kuti anyakufa, ale aenda kale, ali pyadidi kupiringana ale anapuma, pontho ana moyo na lero.

³Mbwenye wadidi kupiringana awiriwa ngule hadzati balwa tayu, ule hadzati ona pyakuipa pinachitika pansi pa thambo tayu.

⁴Ine ndidaona kuti basa yonsene pontho na kupikwanisa konsene pimbachitika na thangwi ya kuipirwa na atsanthemba. Penepi pontho mphyapezi-pezi, nkhulemba m'madzi.

⁵Pupwe ambakhala kwene manja mbwee mbapivunga yekha ene.

⁶Mphyadidi kukhala na pinthu pyakudzala dzanja ibodzi mbukhala pamtendere kusiyana na kukhala na pinthu pyakudzala manja mawiri uku mbukungudzika; penepi nkhulemba m'madzi.

⁷Ine ndidaona pontho chinthu chinango chile ntchapezi-pezi pansi pa thambo:

⁸Pidachitwa na mamuna unango ule akhali khowa; iye nkhabe mwana pontho mbale. Iye hakhapuma tayu pamabasache akuwanga, kwache iye hakhakwana tayu na mfumache. Iye adapivunza yekha ene mbati, “Anaphatira ine mabasa akuwanga tenepayi mbani? Thangwi yache ninji ndinapimana tsenzo? Penepi pontho mphyapezi-pezi, mphyakutsukwalisa pyakwanga!”

⁹Awiri ndi mtombwe kusiyana na kukhala wekha ene, thangwi basa yakuphata anthu awiri imbaoneka:

¹⁰Ngakhala mbodzi anagwa, mwanzacheyo anakwanisa kumulamusa. Ntchinthu chakuvesa nsisi pyakwanga, munthu angakhala yekha ene mbagwa mbapasowa unango wakumphedza.

¹¹Ngakhala anthu awiri anagona pabodzi pene anakwanisa kuva kukhumbirwa. Mbwenye munthu angakhala yekha ene anava tani kukhumbirwa?

¹²Munthu pa yekha ene anakwanisa kukundwa, mbwenye anthu awiri anakwanisa kupitchinjiriza. Nkhambala ya miwasi mitatu nkhabe gwandikirapo tayu.

¹³Mphale wakutcherenga, ule ana nzeru, ngwadidi kupiringana mfumu wakukalamba pontho wakupupwa, ule nkhabe funa uphungu.

¹⁴Pinakwanisika kuti mphale kubuluka m'perezo mbakhala mfumu, penu kubalwa pakutcherenga mbakhala mfumu.

¹⁵Ine ndidaona kuti onsene ale anafamba mbakhala pansi pa thambo, adatewera mphale adapita m'mbuto mwa mfumu ule.

¹⁶Anthu akhatonga iye akhali okhonda lengeseka, mbwenye khuwo inango nkhabe dzakomerwa naye tayu. Penepi pontho mphyapezi-pezi, nkhulemba m'madzi.