Read cisena NYAKULALIKA 5 Bible Online

NYAKULALIKA 5 - cisena bible

NYAKULALIKA 5

¹Chita mphole-mphole ungaenda ku Nyumba ya Mulungu. Mphyadidi kwenda kweneko kavesera kusiyana na kupereka nsembe ninga mumbachitira mapupwe, ale nkhabe dziwa kuti akuchita pyakuipa tayu.

²Toma nyerezera mbudzati longa, pontho leka chimbiza na kudumbira kuna Mulungu. Mulungu ali kudzulu, iwe uli pansi pano, natenepo leka injipisa pyakulonga.

³Ninga mumbachitira ndoto kudza thangwi ya kuinjipa kwa pyakutsalakana sasawambo upupwe umbaoneka thangwi ya kuinjipisa pyakulonga.

⁴Pinadumbira iwe kuna Mulungu kuchita chinango, chimbiza kuchichita, thangwi iye nkhabe komerwa na mapupwe tayu; chita pidadumbira iwepyo.

⁵Mphyadidi kukhonda dumbira kusiyana na kudumbira mbukhonda kupichita.

⁶Leka tawirisa mulomo wako kukudawisa, pontho leka longa kuna nyansembe wa Mulungu kuti, “Ndikhalonga dzendanga.” Thangwi yache ninji kuti Mulungu azhangali na mafala alonga iwe, pontho kuti avunge pinthu pyapha iwe na manjako?

⁷Podi ulote pyako tani mbuinjipisa pyalukonga, pyonsenepyo mphyapezi-pezi. Kwache gopa Mulungu.

⁸Leka dodoma ungaona dziko ikuvuya anyakutcherenga, ikukhonda teweza chilungamo, pontho ikupondereza ufulu wawo; thangwi thubu onsene ana nyakumuyang'anira padzulu pache, pontho onsene awiriwa ana nyakuayang'anira padzulu pawo.

⁹Pyakuvuna pya m'munda pimbakwatwa na onsene; maka-maka mfumu ndiye ambaganyali na pyakuvuna.

¹⁰Nyakuikha mtima pa kobiri nkhabe kwana na kobiri tayu; nyakukhumba mfuma nkhabe kwana na pyonsene pinagumana iye tayu. Penepi pontho mphyapezi-pezi.

¹¹Pinthu pingainjipa, milomo imbainjipambo. Apo mwenechiro ambaganyaliponji, kwache nkhupiyang'ana kwene.

¹²Chitulo cha nyaganyo chimbatapira, podi aperewezwe pyache penu akhute, mbwenye nyapyache nkhabe ona chitulo tayu.

¹³Ine ndaona chinthu chakuipa chakugumisa manungo pansi pa thambo; mfuma kukuwaza enechiro ache.[2]

¹⁴Iwo ambataya mfumawo yonsene thangwi ya kugwiwa kufuna pizinji mbasala nkhabe pinthu pyakuti asiyire anawo.

¹⁵Chitakwa-takwa munthu ambabuluka m'mimba mwa mache, tenepo ninga montho mudadzera iye, montho-monthomo iye anabuluka pansi pano. Iye nkhabe kwata na chinthu chene tayu papinthu pidapha iye na manjache mwakubulusa kaluma, chakuti aphatire m'manja mwache.

¹⁶Chenechi pontho ntchinthu chakuipa chakugumisa manungo: Ninga montho mumbadzera munthu, montho-monthomo iye ambabuluka pansi pano. Apo chimbaganyali iye ninji na basache yakuwanga kufuna kufumbata mphepo?

¹⁷Nsiku zonsene za moyo wache iye ambadya mumdima, pontho kusanyika mtima, utenda, na kuzhangali.

¹⁸Tenepo ine ndidadzindikira kuti mphyadidi pontho mphyakuthema kuna munthu kudya na kumwa pontho na kukomerwa na mabasache onsene akuwanga ambaphata iye mwakubulusa kaluma pansi pa thambo na nsiku zakuchepa zampasa Mulungu; thangwi penepi ndiye pyakumthemera.

¹⁹Kuthimiza penepa, ngakhala Mulungu anampasa munthu mfuma na pinthu mbamchitisa kukomerwa napyo, kukomerwa na pinthu pyakumthemera pontho na pinthu pyaphatira iye basa; penepi ndi mtukwa wa Mulungu.

²⁰Iye nkhabe dzasanyika mtima na kuchepa kwachita nsiku za moyo, podi Mulungu ambachitisa moyo wache kukhala kaliki-liki kukomerwa.