Read cisena NYAKULALIKA 6 Bible Online

NYAKULALIKA 6 - cisena bible

NYAKULALIKA 6

¹Ine ndaona chinthu chinango chakuipa pansi pa thambo, chile chakhala ninga mtolo wakulemera pana anthu.

²Mulungu ambapasa munthu mfuma, chilemedzo, pontho pinthu, towera iye aleke sowa chinthu chonsene chinakhumba mtimache, kwache Mulungu nkhabe kumtawirisa tayu kukomerwa napyo, m'mbuto mwache nyaphena ndiye ambakomerwa napyo. Penepi mphyapezi-pezi, pontho mphyakugumisa manungo.

³Munthu anakwanisa kukhala na ana dzana mbakhala na moyo pyaka pizinji; kwache kukhala kwache na moyo wakulapha nkhabe pinthu tayu ngakhala iye nkhabe komerwa na ufumi wache mbakhonda ikhwa mwadidi m'masiye, tenepo ndimbalonga kuti mwana ene wakubalwa wakufa kale, ali pyadidi pyakwanga kupiringana iye.

⁴Kudza kwache nkhwakusowa basa, ambabisika mumdima, pontho dzinache imbafikhirika mumdima.

⁵Podi kwene kuti iye hadaone kunja tayu, penu kudziwa chinthu na chibodzi chene, iye ali padidi kusiyana na munthu,

⁶podi kwene akhale pyache na moyo pyaka pikwi piwiri, kwache mbakhonda komerwa. Ayi onsenewa nkhabe kwenda kumbuto ibodzi ene tayu?

⁷Munthu ambaphata mabasache onsene akuwanga, towera adyese mulomo wache, kwache mabache nkhabe mala tayu.

⁸Munthu wanzeru ngwadidi tani kupiringana pupwe? Ayi nyakutcherenga kudziwa makhaliro akuthema kumbamganyaliranji?

⁹Mphyadidi kukwana na pinthu pina iwepyo kusiyana na kutsanza mabako. Penepi pontho mphyapezi-pezi, nkhulemba m'madzi.

¹⁰Chinthu chonsene chilipo lero chapaswa kale dzinache, pontho kuti munthu mbani mphyakudziwika kale. Munthu nkhabe thimbana na unango wamphamvu kupiringana iye tayu.

¹¹Mafala angainjipa penepo nkhabe oneka mphuno yache tayu. Apo penepyo pinaganyalinji kuna munthu?

¹²Thangwi mbani anadziwa kuti chadidi ninji kuna munthu pamoyo, pandzidzi wa nsiku zache zakuchepa pontho zapezi-pezi zinagwanda iye kwene pyache ninga chigudu-gudu? Mbani anakwanisa kumpanga pinthu pinafuna dzachitika pansi pa thambo iye angafa?