Read cisena NYAKULALIKA 7 Bible Online

NYAKULALIKA 7 - cisena bible

NYAKULALIKA 7

¹Mbiri yadidi njadidi kusiyana na mafuta akununkhira, pontho nsiku yakufa njadidi kusiyana na nsiku yakubalwa.

²Mphyadidi kwenda kumsuwo kule kuna kusintili kusiyana na kwenda kumsuwo kule kuna phwando. Podi imfa ndiye mamalisiro ache a munthu onsene, anthu amoyo athema kupidziwa penepi mumtima mwawo.

³Kutsukwala nkhwadidi kusiyana na kuseka, thangwi kutsukwala kwa nkhope kumbachitisa mtima kukhala wangwiro.

⁴Mtima wa munthu wanzeru umbanyerezera pya imfa, mbwenye mtima wa pupwe ambauikha patsenzo basi.

⁵Mphyadidi kuva kukusumulula kwa anthu anzeru kusiyana na kusimbwa na mapupwe.

⁶Ninga kuthomuka kwa minga pamoto, ndi sasawa na kuseka kwa pupwe. Penepi pontho mphyapezi-pezi.

⁷Kupondereza kumbasanduza munthu wanzeru kukhala pupwe, pontho kudyekera kumbaipisa munthu.

⁸Mamalisiro a chinthu ngadidi kusiyana na kutoma kwache, pontho kupirira nkhwadidi kusiyana na kugaya.

⁹Leka chimbiza kupinda, thangwi kuzhangali nkhwa mapupwe.

¹⁰Leka vunza kuti, “Thangwi yache ninji kale pinthu pikhafamba mwadidi kusiyana na lero?” Si chinthu chanzeru tayu kuvunza pinthu ninga penepi.

¹¹Ninga kusiyirwa mfuma, sasawambo nzeru nsadidi pyakwanga, mbiziganyalisa munthu onsene pansi pa thambo.

¹²Ninga kobiri ndi mthunzi, sasawambo nzeru ndi mthunzi, kwache nzeru zimbatchinjiriza moyo wa nyakukhala nazo; wenewu ngudidi wa udziwisi.

¹³Nyerezerani pya pinthu pyachita Mulungu: Mbani anakwanisa kudzongola chinthu chidasasanya Mulungu mwakugongonyeka?

¹⁴Pinthu pingafamba mwadidi, komerwa; mbwenye nyatwa zingadza kumbuka kuti: Mulungu ndiye asasanya pyonsene piwiripi, towera munthu aleke dziwa pinthu pinafuna dzamgwera m'tsogolo.[3]

¹⁵Pa moyo wanga wapezi-pezi ndaona pinthu piwiri ipi: Nyakulungama kuvungika na kulungama kwache kwene, pontho nyakudawika kukhala na moyo wakulapha na kudawika kwache kwene.

¹⁶Leka khaliratu wakulungama penu kukhaliratu wanzeru, thangwi yache ninji upivunge wekha ene!

¹⁷Leka khaliratu nyakudawika, penu kukhaliratu pupwe, thangwi yache ninji ufe ndzidzi mbudzati kwana?

¹⁸Mphyadidi kukakamira chinthu chibodzi, ndzidzi onthowo mbukhonda pontho kutaya chinthu chinangocho. Nyakugopa Mulungu pyonsenepi pinamfambira mwadidi.

¹⁹Nzeru zimbachitisa munthu kukhala wamphamvu pyakwanga kupiringana akadamu khumi a mumzinda.

²⁰Padziko ya pansi pano nkhabe na mbodzi ene wakulungama, ule ambachita pyakulungama, pontho ule chipo hadadawe tayu.

²¹Leka ikha khutu kuna pinthu pyonsene pinalonga anthu, gopesera mwinango unava nyabasako akukutikana,

²²thangwi ukupidziwa mumtima mwako kuti iwe ene maka kazinji kene watikana anthu anango.

²³Pyonsene ndidapiyesa na nzeru zanga mbandilonga kuti ine ndidachita phinga kuti ndikhale wanzeru kwache pikhali pyakunensa kupifikira.

²⁴Mbani anakwanisa kugumana nzeru? Izo nsakuzwika pyakwanga pontho nsakunensa kuzivesa.

²⁵Ine ndidaikha mtima kufuna kugumana nzeru, kuzisaka-saka na kuzivesa, pontho kudziwa machitiro a pinthu, kuvesa kupupwa kwachita kudawika, pontho na nsala wa upupwe.

²⁶Ine ndidagumana chinthu chakuvesa kupha pyakwanga kupiringana imfa, mkazi ule mtimache wakhala ninga mulindi penu msampha; ule manjache akhala ninga njema. Nyakuchitisa Mulungu kukomerwayo anamthawa, mbwenye nyakudawika anakweshwa naye.

²⁷Nyakulalika adalonga mbati, “Ngayang'anani ipi ndiye pidagumana ine: Ndikhasakanyula chibodzi chibodzi, towera ndigumane machitiro a pinthu.

²⁸Podi kwene ndikhasaka-saka ndzidzi ukulu ene, kwache sidagumane chinango tayu kupambula ichi: mamuna mbodzi wakulungama pakati pa anthu chikwi, mbwenye nkhabe mkazi na mbodzi ene wakulungama pakati pawo onsene tayu.

²⁹Chagumana ine ntchakuti: Mulungu adasasanya munthu kukhala wakulungama, mbwenye munthu abauka kwenda pyache njirache.”