Read cisena NYAKULALIKA 8 Bible Online

NYAKULALIKA 8 - cisena bible

NYAKULALIKA 8

¹Mbani akhala ninga munthu wanzeru? Mbani ambadziwa kufuthula kwa pinthu? Nzeru zimbagalamusa nkhope ya munthu, pontho zimbabulusa makwinya.

²Vera matongero a mfumu, thangwi iwe udadumbira pamaso pa Mulungu.

³Chimbiza kubuluka pamaso pa mfumu ungachita pyakukhonda kumkomera, thangwi iye anakwanisa kuchita pyonsene pinafuna iye.

⁴Podi mafala a mfumu ngautongi, mbani anakwanisa kulonga kuna iye kuti, “Ninji chinachita imwe?”

⁵Munthu onsene wakuvera matongero ache, nkhabe dzakuwazwa tayu, pontho nyanzeru ambadziwa pyathema iye kuchita, pontho pandzidzi wache.

⁶Thangwi pana ndzidzi wakuthema pontho machitiro adidi a chinthu chonsene, podi kwene kuti nyatwa za munthu zimbamulemera ninga mtolo.

⁷Nkhabe munthu ambadziwa pya m'tsogolo, apo mbani anakwanisa kumpanga pya pinthu pinafuna kudza?

⁸Nkhabe munthu ana mphamvu na moyo wache tayu, nkhabe munthu ana mphamvu na nsiku yakufa kwache tayu. Ninga mumbachitira nyankhondo kukhonda buluswa pandzidzi wa nkhondo, sasawambo kudawika nkhabe dzasudzula anthu ale ambachita pyakudawika tayu.

⁹Pyonsenepi ndidapiona pikhanyerezera ine pya pinthu pinachitika pansi pa thambo pile. Pale anthu anango ana utongi mwenemo anango akubonera thangwi ya utongi una iwo.

¹⁰Ande, ndidaona pontho anthu akudawika akuikhwa m'masiye, anthu ale akhali na chisimo chakwenda na kubwera ku Nyumba ya Mulungu mbasimbwa mumzinda monthomo mudachita iwo pyakuipa pyawo pile. Pyonsenepi mphyapezi-pezi.

¹¹Mseru wa anyakupolomola ungadembuka kutongwa, mitima ya anthu imbasasanya kuchita pyakudawika.

¹²Podi kwene kuti nyakudawa apolomole pyache kadzana mbathimiza basi kukhala na moyo, ndimbadziwa kuti pyonsene pinafamba mwadidi kuna anyakugopa Mulungu.

¹³Mbwenye anyakuipa pinthu pyawo nkhabe dzaafambira mwadidi tayu, thangwi iwo nkhabe gopa Mulungu, pontho nsiku za moyo wawo zakhala ninga chigudu-gudu.

¹⁴Pana chinthu chinango chapezi-pezi chile chimbachitika padziko yapansi pano: anyakulungama kutambira pinthu pyakuthemerana na anyakudawika, pontho anyakudawika kutambira pyakuthemerana na anyakulungama. Penepi pontho ndimbalonga kuti mphyapezi-pezi.

¹⁵Tenepo ndapidziwadi kuti munthu athema kukomerwa pyache, thangwi nkhabe chadidi chinakwanisa munthu kuchita pansi pa thambo kupiringana kudya na kumwa pontho na kukomerwa pyache. Kukomerwa anakhala nako pamabasache akuwanga ndzidzi onsene wa nsiku za moyo wache zile zampasa Mulungu pansi pa thambo.

¹⁶Ndzidzi ukhanyerezera ine kuti ndidziwe nzeru, pontho kuona kaliki-liki anachita munthu pansi pano, maso ache mbakhonda ona chitulo mosiku na masikati ene,

¹⁷tenepo ndidaona pinthu pyonsene pyachita Mulungu. Nkhabe munthu anakwanisa kupidzindikira mwadidi pinthu pyonsene pinachitika pansi pa thambo. Podi kwene kuti ayesere pyache tani kupivesa, kwache iye nkhabe dzapivesa tayu. Podi nyanzeru apilonge pyache kuti iye ambapidziwa, kwache iye nkhabe kwanisa tayu kupivesa.