Read cisena NYIMBO ZA SOLOMONI 1 Bible Online

NYIMBO ZA SOLOMONI 1 - cisena bible

NYIMBO ZA SOLOMONI 1

¹Nyimbo za Solomoni,[1] nyimbo zakukoma kupita nyimbo zinango zonsene.

²Ngandimpsompsone kazinji kene; kundifuna kwako kumbandikomera kupiringana vinyu.

³Wakundikomera ndi mgwadi-gwadi wa mafutako; dzinako yakhala ninga mafuta akununkhira akukhuthuka. Ndi thangwi yache amiyali ambatunduka nawe!

⁴Ngandikwate ndiende nawe pabodzi, ngatende tibanje! Iwe mfumu wanga, ngandidzese m'subi mwako. Ife tinasekera na kukomerwa pabodzi; kufunana kwathu tinakusimba kupiringana vinyu. Iwo hadaphophonye tayu kukufuna!

⁵Akazimwe a ku Yerusalemu, ndine nyakuswipa pontho[2] nyakubalika, wakuswipa ninga makumbi anthembe a ku Kedara, wakubalika ninga chinguwo chakutchinga nacho m'nyumba ya Solomoni.

⁶Lekani kundilulupisa, thangwi ya kuswipa kwanga, thangwi ya kuvulika na dzuwa kwachita ineku. Nkhoswe zanga zidandizhangalira mbandichitisa kuphata basa m'minda yamfesa; ndi thangwi yache ndidachimwana kutsalakana na mundanga ene.[3]

⁷Ngandipange, iwe nyapamtimanga, nkhupi kumbadyesa iwe mabirako? Kumbapumisa iwe pifuyo pyako masikati nkhupi? Thangwi yache ninji ndichite kukusaka-saka pakati pa mikumbi ya amakabuswa anango?

⁸Ngakhala hunadziwako tayu, nyakubalikawe pakati pa akazi anango onsene, tewera mkumbi wa mabira mbukadyese anambuzi ako chifupi na makumbi a makabuswa.

⁹Iwe nyapamtimanga, kubalika kwako kwakhala ninga kavalo wa pachingolo cha mfumu wa Iguputo.

¹⁰Maputu ako ngakubalika na mphete za m'makutu mwako, khosi yako njakubalika na mikufu yamiyala yakudula.

¹¹Tinati tikusasanyire pyakuthemesera pyagolidi pyakukhala na usanga wasiliva.

¹²Ndzidzi ukhadya mfumu pathebulu pache, mgwadi-gwadi wa mafutanga udakalangira.

¹³Nyapamtimanga kuna ine akhala ninga kafuthwa ka mafuta amure, kale kambakhala pakati pa mabele anga.

¹⁴Nyapamtimanga kuna ine akhala ninga tsaputu ya maluwa akufira, ale ambagaka mbetete m'minda yamfesa ya ku Engedi.

¹⁵Wabalika tani tenepa, nyapamtimanga! Ande, ndiwe wakubalika! Maso ako akhala ninga maso a nkhangaiwa.

¹⁶Wabalika tani tenepa, nyapamtimanga! Ande, ndiwe wakubalika! Talimbathu ndi mpovu cha iwo.

¹⁷Nsanamira za nyumbathu nsa miti yamkungudza, pontho mphalupalu zache nsa miti yapaina.