Read cisena NYIMBO ZA SOLOMONI 2 Bible Online

NYIMBO ZA SOLOMONI 2 - cisena bible

NYIMBO ZA SOLOMONI 2

¹Ndine luwa ya ku Sharoni luwa yakubalika m'phedi.

²Ninga luwa yakubalika pakati pa minga ndi sasawa na nyapamtimanga pakati pa amiyali.

³Ninga muti wantheme pakati pa miti mumsitu, ndi sasawa na nyapamtimanga pakati pa aphale. Ine ndimbakomerwa na kukhala mumthunzi mwache, pontho nsapo zache nsakutapira pyakwanga kuna ine.

⁴Iye aenda nane kunyumba ya phwando; bandera idatchimika iye pana ine nkhundifuna kwache.

⁵Iye ambandigalamusa na mfesa zakuuma, pontho ambandisisimusa na ntheme, thangwi ndafeluka na chikhumbo.

⁶Mkono wache wamabzere uli kunkhodolo kwanga, uku na mkono wache wamadyo andikhumbatira nawo.

⁷Imwe akazi a ku Yerusalemu, dumbirani kuna ine na mphamvu za mbala na nyasa kuti imwe nkhabe dzalamusa penu kutekenya kufunana kufikirana kuchite kufuna kokha ene.

⁸Ngavesera, ndi fala ya nyapamtimanga! Ngayang'ana, iye akudza mbanumpha-numpha m'mapiri, pontho akuvina-vina m'pitunda.

⁹Nyapamtimanga akhala ninga mbala penu nyasa imuna. Ngayang'ana! Iye aimira dzololo kutcheru kwa fufu yathu, kuyang'ana na pamazhanera, pontho kusuzumira na pamangalade.

¹⁰Nyapamtimanga adalonga kuna ine mbati, “Ngalamuka, nyapamtimanga, nyakubalikanga, ngatende nane pabodzi.

¹¹Ngayang'ana! Mainja amala, mvula yaleka, pontho yamala.

¹²Maluwa akuoneka mbetete padziko yapansi; ndzidzi wakuimba wafika, kulira kwa nkhangaiwa kukuveka m'dziko mwathu.

¹³Makuyu atoma kubala nsapo; maluwa a mfesa akugwadira mwadidi. Ngalamuka tende, nyapamtimanga; nyakubalikanga, tende nane pabodzi.”

¹⁴Nkhangaiwanga ili swiswiswi m'minyanja ya mwala, pambuto yakupata m'matelero. Ngandionese nkhope yako, ngandileke ndivesere falako; thangwi falako njakukoma, pontho nkhope yako njakubalika.

¹⁵Ngatiphatirenimbo mibinziyo, ana a mibinzi, ale ambapwayula kuvunga minda yamfesa, mindathu yamfesa ikuchita kwene maluwa ile.

¹⁶Nyapamtimanga ngwanga ene basi, pontho inembo ndine wache ene basi; iye ambadyesa mabirache pakati pa maluwa.

¹⁷Mpakana kunja mbee, pontho mithunzi kuthawa, zungunuka, nyapamtimanga, mbukhale ninga mbala, penu nyasa imuna pamapiri a makolong'ondo.[4]