Read cisena NYIMBO ZA SOLOMONI 3 Bible Online

NYIMBO ZA SOLOMONI 3 - cisena bible

NYIMBO ZA SOLOMONI 3

¹Mosiku onsene patalimba panga ndidasaka-saka ambafuna mtimanga ule; ine ndidamsaka-saka, kwache sidamgumane tayu.

²Chinchino ndinati ndilamuke mbandimphemphesa mumzindamu, kugwanda na m'misewu mwache na mupintalo pya mumzinda. Ndinati ndimsake ambafuna mtimanga ule. Tenepo ndidamsaka-saka, kwache sidamgumane tayu.

³Anyakulondali adandigumaniza, ndzidzi ukhafambira iwo mzindawo. Ine ndidaavunza kuti, “Ayi mwandionerambo ambafuna mtimanga ule?”

⁴Sindzidzi nkhulekana nawo, ndidamgumana ambafuna mtimanga ule. Ndidamfumbata mbandikhonda kumulekeza, mpakana ndidadza naye kumusa kwa mama, kusubi ya nyakundibala.

⁵Imwe akazi a ku Yerusalemu, dumbirani kuna ine na mphamvu za mbala na nyasa kuti imwe nkhabe dzalamusa penu kutekenya kufunana kufikirana kuchite kufuna kokha ene.

⁶Mbani weneyu anabulukira m'thando yatchetchayi? Iye ali phwira-phwira ninga utsi, wakukhala na mgwadi-gwadi wa mafuta amure, na pyakufukiza pyakununkhira pya anyamalonda.

⁷Ngayang'ana! Chenecho ndi mtembero wa Solomoni, wakuperekezwa na anyankhondo makumatanthatu, amuna akufunika pyakwanga a mu Israele.

⁸Onsene a iwo amangirira matalasada, onsenewo mbanyaluso pankhondo, kada munthu talasadache m'chuno mwache, kusasanyikira mapanga na mosiku.

⁹Mfumu Solomoni adasasanyisa mtembero; iwo udasasanywa na matabwa a ku Lebanoni.

¹⁰Miti yache ya m'nkhomo idakukutizwa na siliva; thako yache idakukutizwa na golidi. Chakukhalira chache chidakukutizwa na nguwo yamsuzi wanyemba, wakulukwa mwadidi na akazi a ku Yerusalemu.[5]

¹¹Bulukani panja, imwe akazi a ku Zioni, mbamuyang'ane Mfumu Solomoni. Iye avala chipewu chidamvazika mache chile, pansiku idakazhali iye, nsiku idakomerwa mtimache ile.