Read cisena NYIMBO ZA SOLOMONI 4 Bible Online

NYIMBO ZA SOLOMONI 4 - cisena bible

NYIMBO ZA SOLOMONI 4

¹Wabalika tani tenepa, nyapamtimanga! Ande, ndiwedi nyakubalika! Maso ako m'chakumpsampsira nkhope yako akhala ninga maso a nkhangaiwa. Tsisi yako ili vulu-vulu ninga mkumbi wa mbuzi wakubidira kubulukira pa phiri ya Gileadi.

²Mano ako achena ninga mkumbi wa mabira wakubulukira kwene kachingwa ubweya, pontho kusambiswa. Mano onsene andandalika mwadidi; mbapasowa na makwenje ene.

³Milomo yako yakhala ninga teteluke wakufira; mulomo wako wabalika pyakwanga. Maputu ako akhala ninga mapandu antheme m'chakumpsampsira nkhope chavala iwecho.

⁴Khosi yako yakhala ninga nsanja ya Davite, yakutandwa mwadidi, pontho yakumyalala, yakukhala na mikufu yakuoneka ninga pyakugedera matswimo pikwi pya anyankhondo.

⁵Mabele ako akhala ninga ana awiri a mbala, ninga ana mapasa a mbala, akugwedula-gwedula pakati pa maluwa.

⁶Mpakana kunja mbee, pontho mithunzi kuthawa, ndinati ndiende kuphiri kule kwawazwa mure, pontho kupitunda kumbakhala pyakufukiza pyakununkhira kule.

⁷Muna iwe pyonsene mphyakubalika, nyapamtimanga; nkhabe chakuphophonyeka tayu muna iwe.

⁸Tende nane pabodzi kubuluka ku Lebanoni, mankhadzianga, tende nane pabodzi kubuluka ku Lebanoni. Tchitha pansonga ya phiri ya Amana, pansonga ya phiri ya Seniri, pontho na Herimoni, kubulukira dzimba ya nkhalamu, pontho pamapiri akukhala nyalugwe.

⁹Iwe wanditopola mtima, nyapamtimanga pontho mankhadzianga; iwe wanditopola mtima na kundiyang'ana kwa maso ako, na usanga ubodzi wa mkufu wako.

¹⁰Kundifuna kwako kumbandichitisa kukomerwa, nyapamtimanga pontho mankhadzianga! Kundifuna kwako kumbandichitisa kukomerwa kupiringana vinyu, pontho mgwadi-gwadi wa mafuta ambadzola iwe, wapita pyakununkhira pinango pyonsene.

¹¹Milomo yako imbajoja pyakutapira, mankhadzianga, ninga mayana a manyuchi; kunsi kwa lulume yako kuna mkaka na manyuchi. Mgwadi-gwadi wa nguwo zako wakhala ninga wa ku Lebanoni.

¹²Iwe wakhala ninga munda wakutchingwa na mpanda, nyapamtimanga pontho mankhadzianga; iwe wakhala ninga mchera wakufungwa kuna anango, ninga mphuno ya madzi yakuzweremethwa.

¹³Iwe wakhala ninga munda wa nsapo zantheme mbazibala nsapo zadidiletu. Mwenemo nkhabe sowamo maluwa akufira na mbewu ya naridi[6] tayu,

¹⁴nkhabe sowamo naridi na safroni tayu, kalamusi na kinamoni nkhabe sowamo tayu; muna mbewu zamtundu onsene zakusasanyira pyakufukiza pyakununkhira; muna mure na aloe, pontho na pyakununkhira pya mtundu onsene.

¹⁵Iwe ndiwe mphuno ya madzi m'munda, mchera wa madzi akufamba, mkulo wakukuka kubulukira ku Lebanoni.

¹⁶Lamuka, mphepo ya mbalu; idza, m'mwera! Dimira kumunda kwanga, towera mgwadi-gwadi wache ukalangire konsene kwene. Mulekeni nyapamtimanga adze kumunda kwache; mulekeni alawe nsapo zache zadidiletu.