Read cisena NYIMBO ZA SOLOMONI 5 Bible Online

NYIMBO ZA SOLOMONI 5 - cisena bible

NYIMBO ZA SOLOMONI 5

¹Ndadza m'munda mwanga, nyapamtimanga, pontho mankhadzianga; ine ndagumanyisa mure pabodzi pene na pyakununkhira pyanga. Ine ndadya mayananga pontho na manyuchi; ine ndamwa vinyu wanga pontho mkakanga. Dyani, ashamwali anga, mwani; mwani mpakana mwakhuta, anyapamtimanga.

²Ine ndagona kwache mtimanga hudagone tayu. Ngavesera! Nyapamtimanga akudidimiza pamsuwo: Ngandifungulire, nyapamtimanga, pontho mankhadzianga, nkhangaiwanga, nyakusowa panango pakuphophonyeka. Msolo wanga wanyontholerwa na bume, pontho tsisi yanga yanyontholerwa na chinyontho cha mosiku.

³Ndadula mkhanjo wanga; ayi ndiuvale pontho? Ine ndatsuka manyalo anga; ayi ndiapondese pontho mataka?

⁴Nyapamtimanga aikha mkono wache pabenga ya msuwo; ine mtimanga palu kudima-dima thangwi ya iye.

⁵Ine ndidalamuka kuti ndimfungulire, uku manjanga ali mememe na mafuta amure, mwenemo mure akukuka m'pyala pyanga kumphinga ya msuwo.

⁶Ndidamfungulira nyapamtimanga, kwache nyapamtimanga akhadenda pyache; mtimanga udasanyika pyakwanga thangwi ya kwenda kwacheko. Ine ndidamsaka-saka kwache sidamgumane tayu. Ndidamchemera kwache iye hadanditawire tayu.

⁷Anyakulondali adandigumaniza pikhafambira iwo mzindawo. Iwo adandilikita mbanditsupula-tsupula, pontho adandidulisa chakufindika changa, anyakulondali akhaonera mpanda wa mzinda ale.

⁸Dumbirani akazi a ku Yerusalemu kuti imwe mungamgumana nyapamtimanga munampanga kuti ine ndalenduka na chitchuwo.

⁹Nyapamtimako abalikanji kupiringana anango onsene, iwe nyakubalika kupiringana akazi anango onsene? Ninji chakufunika chili muna iye chakuti utidumbirise kuchita tenepo?

¹⁰Nyapamtimanga ngwakubalika, pontho wakusiririka, iye ngwakufunikaletu pakati pa amuna pikwi khumi.

¹¹Msolo wache ndi golidi cha iye cha iye; tsisi yache njamasengere, pontho ili bidoo ninga khungubwe.

¹²Maso ache akhala ninga nkhangaiwa m'khundu-khundu mwa thawale, akusambiswa mkaka, pontho akuikhwa mwadidi m'mbuto mwache.

¹³Maputu ache akhala ninga mtumbira wakubzalwa mbewu za pyakununkhira. Milomo yache yakhala ninga maluwa akujoja mure.

¹⁴Mikono yache yakhala ninga mphinga zagolidi zakuthemeserwa na miyala ya topazi. Manungo ache ali myaa ninga nyanga zakuthemeserwa na miyala ya safire.

¹⁵Miyendo yache yakhala ninga mizati yamiyala ya alabasta yakukhala pathako yagolidi chadi-chadi. Kuoneka kwache kwakhala ninga mapiri a Lebanoni na miti yache yakusankhulika yamkungudza.

¹⁶Mulomo wache paokha ene ngwakutapira; pyonsene muna iye mphyakusiririka. Weneyu ndi nyapamtimanga, pontho shamwalianga, akazimwe a ku Yerusalemu.