Read cisena NYIMBO ZA SOLOMONI 7 Bible Online

NYIMBO ZA SOLOMONI 7 - cisena bible

NYIMBO ZA SOLOMONI 7

¹Iwe mwali wachifumu, wabalika tani tenepa, manyalo ako uku avala nkhwaira. Ntchafu zako nsakubulungira ninga miyala yakudula yakusasanywa na manja a nyaluso.

²Mchombo wako uli zungulire ninga ndilo, ile nkhabe sowamo vinyu wakudzipa tayu. Chuno chako chili ning'u-ning'u ninga msumbu wa tirigu, wakumangwa na maluwa.

³Mabele ako akhala ninga ana awiri a mbala, ninga ana mapasa a mbala.

⁴Khosi yako yakhala ninga nsanja ya nyanga. Maso ako akhala ninga mathawale a mu Heshiboni chifupi na msuwo wa Beti-Rabimu. Mphuno yako yakhala ninga nsanja ya Lebanoni yakuyang'anisana na Damasiko.

⁵Msolo wako uli neng'a ninga phiri ya Karimele. Tsisi yako yakulapha ili vulu-vulu; mfumu atunduka nayo.

⁶Wabalika tani tenepa, pontho wakoma tani m'maso tenepa, nyapamtimangawe, umbandichitisa kukomerwa pyakwanga!

⁷Chimo chako chili wee ninga muti wamdikhwa; mabele ako akhala ninga matsaputu a nsapo.

⁸Ine ndidalonga kuti, “Ndinati ndikwire m'muti wamdikhwa; ndinati ndikaphate nsapo zache.” Mabele ako mbakhale ninga matsaputu a mfesa, pontho mgwadi-gwadi wa muyako mbukhale ninga ntheme,

⁹pontho mulomo wako mbukhale ninga vinyu wakudzipa. Vinyu mbaendeletu kuna nyapamtimanga, kuchita kukukambo m'milomo na m'mano mwache.[9]

¹⁰Ine ndine wache wa nyapamtimanga, tenepo chikhumbo chache chili pana ine.

¹¹Ngadza kuno nyapamtimanga, tende kuminda, tende tikagone kumidzi.[10]

¹²Tinati tilamuke kunja kuli mbuu kwenda kuminda yamfesa kaona ngakhala mfesa zaphwitha, penu zachita maluwa, pontho ngakhala ntheme zina maluwa, kweneko ndinati ndikakuonese kukufuna kwanga.

¹³Iwe unakwanisa kuva khwema ya mchena, pontho pamsuwo pathu pana nsapo zonsene zakukoma m'maso, zachinchino na zakale zene, zakukoyera ine zile, iwe nyapamtimanga.