Read cisena NYIMBO ZA SOLOMONI 8 Bible Online

NYIMBO ZA SOLOMONI 8 - cisena bible

NYIMBO ZA SOLOMONI 8

¹Mbudakhala kwene kuti ndiwe nkhoswe yanga, pontho ule adayamwa bele ya mamanga! Ngakhala ndidakugumana panjira, ine mbidakumpsompsona, penepo nkhabe unango mbadandilulupisa tayu.

²Ine mbidenda nawe kumsuwo kwa mamanga, ule adandifunzisa. Ine mbidakupasa vinyu wakudzipa kuti umwe, pontho madzi a ntheme.

³Mkono wache wabzere uli nama-nama kunkhodolo kwanga, uku mkono wache wamadyo wandikhumbatira.

⁴Imwe akazi a ku Yerusalemu, dumbirani kuna ine kuti imwe nkhabe dzalamusa penu kutekenya kufunana kufikirana kuchite kufuna kokha ene.

⁵Mbani weneyo analuthuka kubulukira m'thando yatchetchayo uku ali tsami-tsami pa nyapamtimache? Pansi pa muti wantheme ndidakulamusa, penepo mako adakubala, penepo iye adathabuka na mtswotswo mbakubala.

⁶Ndiikhe mumtima mwako ninga chidindo, ninga chidindo pamkono pako, thangwi kufunana nkhwamphamvu ninga imfa, pontho ntchanje njakukala mtima ninga masiye. Imbapisa ninga moto wakuyerima, pontho ninga malulume a moto washungu.

⁷Madzi ainjipe pyawo tani nkhabe kwanisa kuthimisa kufunana tayu; podi madzi makulu nkhabe kwanisa kukukukulula tayu. Ngakhala munthu unango anapiyesera kugula kufunana na mfumache yonsene ina iye, pinafuna iye chitapyo analulupiswa napyo monsene mwene.

⁸Ife tina nyamaingathu wamng'ono, kwache iye nkhabe na mabubusa ene tayu. Apo tichitenji naye nyamaingathuyi, iye angavunzirwa?

⁹Iye mbadakhala fufu, ife mbatidamanga nsanja yasiliva pana iye; iye mbadakhala msuwo ife mbatidamfungira na matabwa amkungudza.

¹⁰Ndine fufu, pontho mabele anga akhala ninga nsanja. Natenepo kuna iye ndasanduka nyakumdzesera kukomerwa.

¹¹Solomoni akhali na munda wamfesa mu Baala-Hamoni mbaupereka mundachewo kuna anyantchoche. Kada munthu adathema kudza na kobiri zasiliva chikwi chibodzi zakubulukira kunsapo.

¹²Kwache mundanga wamfesa ngwanga ene kuti ndiupereke; kobiri zako zasiliva chikwi chibodzi, iwe Solomoni, mbukhale nazo pyako, pontho kobiri zasiliva madzana mawiri nsa anyakuyang'anira nsapo.

¹³Iwe nyakukhala m'minda, ashamwali anga anafuna kuvesera falako. Ngandileke ndiiveserembo!

¹⁴Chimbiza kudza kuna ine, nyapamtimanga, ninga mbala penu nyasa paphiri yakumera pyakununkhira.