Read cisena YESAYA 1 Bible Online

YESAYA 1 - cisena bible

YESAYA 1

¹Bukhu yeneyi ikulonga pya pinthu pidatchulula Mulungu kuna Yesaya mwana Amozi pya Yuda na Yerusalemu pandzidzi wa utongi wa Uzia, Yotamu, Ahazi na Hezekia, ale akhali mafumu a Yuda.

²Ngavesera, iwe kudzulu! Ikha khutu, iwe dziko yapansi! Thangwi MBUYA alonga kuti, “Ine ndidabala ana mbandialera kuakuza, mbwenye lero iwo andipandukira.

³Podi na ng'ombe ene imbadziwa mbuyache, na bulu ene ambadziwa mumbamdyesera mbuyache, mbwenye Israele nkhabe kudziwa tayu, anthu anga nkhabe vesa pinthu tayu.”

⁴Sha! Iwe dzinza yakudawika, anthu ale alemerwa na pyakudawa, anthu akubalwa na anthu akuipa, pontho ana akukula na kuchita pyakupotoka. Iwo amkhonda MBUYA; iwo adalulupisa Nyakuchena wa Israele mbampasa pyawo nkhodolo.

⁵Mwatani munafuna kuti ndikumenyeni pontho? Mwatani munati nganganga kupandukira? Msolo wanu onsene wamala supuka-supuka, pontho mtimanu ukusanyika.

⁶Kubulukira kumanyalo mpakana kumsolo nkhabe panangombo padidi tayu. Ponsene pene pana mibzimbiri, kutchonkheka na pironda; pironda pyanu mphyokhonda tsuka, penu kumangwa na tsakala, penu kukhwazwa mafuta kuti pifewe tayu.

⁷Dziko yanu yasala madembe, mizindanu yamalwa piswa moto; mindanu yamala vungwa na alendo mwenemo imwe muli maso mbuu, iyo yasanduka thema, pontho yakundwa na anyakudza pyawo.

⁸Yerusalemu asala yekha ene ninga nsanja m'munda wamfesa, ninga khumbi m'munda wamavembe, pontho ninga mzinda wakuzungulirwa na anyamalwa.

⁹MBUYA Wamphamvu zonsene mbadakhonda kutisiya na moyo anango a ife, mbatidasanduka ninga mzinda wa Sodomu, mbatidakhala ninga mzinda wa Gomora.

¹⁰Ngaveserani mafala a MBUYA, imwe atongi, ale mwakhala ninga a ku Sodomu; ikhani khutu kuna mwambo wa Mulungu wathu, imwe anthu, ale mwakhala ninga a ku Gomora!

¹¹MBUYA akulonga kuti, “Nsembe zanu zizinjizo kuna ine ninji? Ine ndakwana nazo nsembe zanu zakupyererazo, nsembe za mabira achimuna na mafuta a nyama zanu zakunenepazo; chiropa cha ng'ombe, ana mabira na mbuzi nkhabe kundikomera tayu.

¹²Pinadza imwe pamaso panga, mbani akupangani kuti mudze nazo? Lekani ponda-ponda pintalo pyanga?

¹³Lekani kudza na pyakupereka pyanu pyapezi-pezipyo. Pyakufukiza pyanu pyakununkhira pimbandinyansira. Ine nkhabe pirira tayu na migumano yanu yakupambulika, kusekera kwanu Kubalwa kwa Mwezi na Nsiku yakupuma; pipembedzo pyanu pyadzala na pyakudawa.

¹⁴Kusekera kwanu Kubalwa kwa Mwezi pontho na maphwando anu anango akusankhulikawo ndimbanyansirwa nawo pyakwanga. Ipyo pyasanduka pinthu pyakundivesa kupha; ine ndatopa napyo.

¹⁵Imwe mungakwiza manjanu m'dzulu kupemphera, ine ndinakubisirani nkhope yanga; podi kwene mupemphere pyanu tani, ine nkhabe dzapiikha konta tayu, thangwi manjanu amala dzala na chiropa.

¹⁶Sambani m'manja, pontho picheneseni mwekha ene. Bulusani mabasanu akuipa pamaso panga. Lekani kuchita pyakudawika,

¹⁷funzani kuchita pyakulungama. Saka-sakani chilungamo, anyakuponderezwa imwe muaphedze; tchinjirizani ana masiye, pontho akhalireni kunduli amamfelwa pamseru wawo.”

¹⁸MBUYA akulonga kuti, “Tendenitu mphapo titongane mseru: Podi kwene kuti pyakudawa pyanu pikhale pyakufira ninga chiropa, ipyo pinachena ninga matalala;[1] podi kwene pikhale pyakufira ninga mphinimini, ipyo pinachena ninga thonje.[2]

¹⁹Ngakhala imwe munasasanyika kundivera, imwe munadya pyadidi pya dziko yeneyi;

²⁰kwache ngakhala imwe munakhonda mbamupandukira, imwe munavungwa na talasada. Thangwi alonga ndi MBUYA.”

²¹Yang'anani kusanduka puta kwachita mzinda wakukhulupirikawu! Kale iye akhali wachilungamo; pyakulungama pikhakhala muna iye, kwache lero asanduka mphandu.

²²Silivako asanduka wapezi-pezi, vinyu wako wadidiletu amala sapuka.

²³Atongi ako ngakupandukira, iwo mbashamwali a mbava; onsenewo kudyekerwa nkhudya kwawo, ndzidzi onsene kufuna kutambira mitukwa basi. Iwo nkhabe tchinjiriza ana masiye, pontho miseru ya amamfelwa nkhabe fika pamaso pawo tayu.

²⁴Natenepo Mbuya, MBUYA Wamphamvu zonsene, Nyamphamvu wa Israele akulonga kuti, “Ehede! Anthu anathimbana na ine ale, ndinaamala gwebede, anyamalwanga ndinaabwezera ndekha ene.

²⁵Ndinakutchunyusa pikulu pene; ndinakunyungulusa kubulusa pyakuipa pyako mbandibulusa masepu-sepu onsene muna iwe.

²⁶Ndinakubwezera atongi ninga ontho akhali na iwe pakutoma pale, mbandichita chibodzi-bodzi na mapungu ako. Kubuluka penepo iwe unachemerwa Mzinda Wakulungama, pontho Mzinda Wakukhulupirika.”

²⁷Na thangwi yakuti MBUYA ngwachilungamo, iye anaombola Zioni, na thangwi ya kulungama kwache iye anaombola anyakuleka pyakudawa pyawo.

²⁸Mbwenye anyakupandukira na anyakudawa, onsenewo anamala vungwa, pontho na anyakukhonda MBUYA ene, onsene anamala vungwa.

²⁹“Iwe unachita manyadzo na miti yamthundu imbanyadira iwe ile; nkhope yako inatota na manyadzo, thangwi ya mindako yakupambulika ile.[3]

³⁰Iwe unakhala ninga muti wamthundu wakuunyala masambache, pontho ninga munda wakusowa madzi.

³¹Mamuna wamphamvu zache anasanduka nkhuni yakutchokoya, pontho mabasache ninga mathotholi; pyonsenepyo pinapyera kubodzi kwene wakusowa munthu na mbodzi ene wakuthimisa motowo.”