Read cisena YESAYA 10 Bible Online

YESAYA 10 - cisena bible

YESAYA 10

¹Dzedze kuna anyakusasanya matongero akusowa chilungamo, kuna ale ambalemba matongero kufuna kupondereza kwene anthu anango basi,

²towera adyere nkope-kope anyakutcherenga pontho kukhondera chilungamo cha anthu anga anaponderezwa ale, kudyera nkope-kope akazi amamfelwa, pontho kubera ana masiye pinthu pyawo.

³Ayi munachita tani pansiku ya kutchunyuswa, nsiku inafuna dzabwera nyatwa kubulukira kudziko yakutali ile? Nkhwa mbani kunafuna imwe dzathawira kuti mukaphedzwe? Nkhupi pontho kunafuna dzasiya imwe mfuma zanu?

⁴Nkhabe pontho chinango chinafuna dzasala tayu mbwenye kutchulima kwene pakati pa anyakuphatwa unyaperezo, penu kugwa pakati pa anyakuchekwa. Podi kwene kuti pikhale tenepo, ukali wa MBUYA hudambombowe tayu, pontho mkono wache uli fogo kuatchunyusa basi.

⁵MBUYA akulonga kuti, “Dzedze kuna Asiria, mtswamu wa ukali wanga, pontho ndodo ya shungu yanga!

⁶Ine ndamtumizira madzinza okhonda tsalakana pya Mulungu, ndidamgwinyira kuna anthu ambandizhangalisa ale, kuti akavunge na kupokosera mfumawo yonsene, pontho kuapondedza onsenene ninga matope m'njira.

⁷Kwache penepi si pile pikhafuna iye kupichita tayu, penepi si pile pikhanyerezera iye kupichita tayu; manyerezero ache ngakufuna kuvunga kwene basi, pontho kupuluza madzinza azinji ene.

⁸Mfumu wa ku Asiria alonga mbati, ‘Ayi akadamu anga onsene ankhondo si mafumu tayu?

⁹Ine ndidakunda Kalino ninga mudachitira ine Karikemishi, ndidakunda Hamati ninga mudachitira ine Aripadi, pontho Samaria ninga mudachitira ine Damasiko.

¹⁰Ngakhala mkono wanga udaphata maufumu a anthu ambapembedza milungu ale, ale mifanikizo yawo njikulu-ikulu kupita ya ku Yerusalemu na Samaria,

¹¹ayi ine ndingachimwane kuvunga Yerusalemu na mifanikizo yache, ninga mudachitira ine kuna Samaria na mifanikizo yache?’ ”

¹²Mbuya angamalisa mabasache onsene akupokanyisana na Phiri ya Zioni na Yerusalemu, analonga mbati, “Ine ndinatchunyusa mfumu wa ku Asiria, thangwi ya pikhumbo pyakunyada pya mtimache, pontho kutumbama kumbachita iye kule.

¹³Thangwi iye akulonga kuti, ‘Na mphamvu za manjangawa ine ndachita pinthu penepi, pontho na nzeru zanga, thangwi ndine nyakuvesa pinthu, ine ndidafudza madire a madzinza mbandiapokosera mfumawo; ninga nyamphamvu, ine ndidakunda mafumu awo.

¹⁴Ninga munthu wakufikisa mkono wache m'chisa, sasawambo ine mkono wanga udafika pana mfuma ya madzinza; ninga mumbachitira anthu kugumanyisa mabulazi, inembo ndidagumanyisa madziko onsene nee na ibodzi ene idaphiphidza penu kuyashamula kulira tayu.’ ”

¹⁵Mbwenye MBUYA akulonga kuti, “Ayi mbadzo ingakwanise kupiyesa yokha ene ikulu kupita nyakuiphatisa basa, penu mpeni wa macheka kugaya kupiringana nyakuuphatisa basa? Penepa panakhala ninga mtswamu ukuzunguza munthu wakuphatisa basa, penu chigomba kuthukula munthuyo!”

¹⁶Natenepo Mbuya, MBUYA Wamphamvu zonsene anatumiza utenda wakanyera pana anyankhondo ache amphamvu, pontho kulunkuma konsene kwa mfumuyo kunapya na moto okhonda thima.

¹⁷Cheza cha Israele chinasanduka moto, Nyakuchenayo anasanduka malulume a moto; nsiku ene ibodzi basi unagaka na kupyerezaletu ntcheswa na nyakhanche ene.

¹⁸Kukoma m'maso kwa misitu yache pontho mindache yamataka akubalisa pinthu pinavungika monsene mwene ninga kumala na kupakatika kumbachita munthu wakukhala na utenda.

¹⁹Tenepo miti yakusalira m'misitu mwachemo inakhala mphalanga-mphalanga mwakuti podi na mwana ene anakwanisa kuilengesa.

²⁰Pansiku yeneyo, anyakusalira mu Israele, anyakusalira na moyo pa pidzukulu pya Yakobo, nkhabeve dzanyindira munthu adaakhamwadza ule tayu, mbwenye anati anyindire MBUYA, Nyakuchena wa Israele monsene mwene.

²¹Anyakusalira na moyo anabwerera, anyakusalira pa pidzukulu pya Yakobo anabwerera kuna Mulungu Wamphamvu.

²²Podi kwene kuti anthu anu Aisraele ainjipe pyawo tani ninga tchetcha ya pagombe, anyakusalira ene basi ndiye anafuna dzabwerera. Kuvungika kwalongwaletu pontho nkhwakuthema monsene mwene.

²³Thangwi Mbuya, MBUYA Wamphamvu zonsene anati avunge dziko yonsene ninga montho mudatongera iye mule.

²⁴Natenepo ipi ndiye pyalonga Mbuya, MBUYA Wamphamvu zonsene: “Imwe anthu anga ambakhala mu zioni ale, lekani chita mantha na anthu a ku Asiria ambakukwapulani na ndodo ale, pontho ambakulikitani na chigomba ale ninga mudakuchitirani anthu a ku Iguputo.

²⁵Chinchino ene pano ukali wanga pana imwe unati umale, pontho shungu yanga inati igwinyikire kuna iwo kuavunga.”

²⁶MBUYA Wamphamvu zonsene anaakwapula na mtswamu, ninga mudakhamwadzira iye Amidiani paphanzwi ya Orebu; anamenyesa ndodo yache panyanza ninga montho mudachitira iye mu Iguputo.

²⁷Pansiku yeneyo ndinakubulusirani mitolo idaikha Asiria m'mapewa mwanu ile, pontho kusudzula goli-goli ili m'khosi mwanu ile; goli-goli inati itchoke thangwi ya kunenepa.

²⁸Anyamalwa apita mu Aiati;[16] iwo agwanda na ku Migironi; iwo akoyesa mitolo yawo mu Mikimashi.

²⁹Iwo awambuka pamakata pontho na mosiku adamanga msasa pa Geba. Anthu a ku Rama akutetemera na mantha; anthu a ku Gibea, mzinda wa Sauli, athawa.

³⁰Lirani imwe anyakukhala mu Galimu! Laisha ngavesera kuno! Tawirani, imwe anthu a mu Anatoti.

³¹Madimena ali m'kati kuthawa; anthu a ku Gebimu amala bisala.

³²Lero ontho anyamalwa anaimira mu Nobu, iwo anaponya mashoko awo kuthuswa anthu a pa phiri ya Zioni, phiri ya mu Yerusalemu.

³³Yang'anani, Mbuya, MBUYA Wamphamvu zonsene anagwanda anyamalwa na mphamvu zikulu ninga nthambi za miti; miti yakulapha inagwiswa, miti yakunthemphuka inagwiswai.

³⁴Iye anasadza-sadza msitu na mbadzo; Lebanoni na miti yache yakufunika inagwa.