Read cisena YESAYA 11 Bible Online

YESAYA 11 - cisena bible

YESAYA 11

¹Mphukira inaphwitha pachitsa cha Yese; kubulukira pa mitsitsi yache nthambi inakula.

²Mzimu wa MBUYA unakhala pana iye, mzimu wanzeru pontho wakuvesa pinthu; mzimu wauphungu pontho wamphamvu; mzimu waudziwisi pontho wakugopa MBUYA.

³Iye anakomerwa pyakwanga na kuvera MBUYA. Kutonga kwache mseru nkhabe dzapichita mwakuyang'ana nkhope, penu kuchita kupangwa pyakuchita tayu.

⁴Iye anatonga mseru anyakutcherenga nachilungamo, mbaikhira kunduli anyakuponderezwa pinatongwa iwo mseru. Mafala akubulukira m'kanwa mwache anakhala ninga ndodo kumenya nayo anyakudawika m'dziko yapansi, pontho na matongero a m'kanwa mwache iye anapha anyakuipa.

⁵Pyakulungama pinakhala ninga bande m'chuno mwache, pontho kukhulupirika mbakukhala ninga mcheka m'chuno mwache.

⁶Mbinzi na mabira pinakhala pabodzi pene na mtendere; anyalugwe anagona pansi pabodzi pene na mbuzi. Anamphulu na nkhalamu pinadyera[17] pabodzi pene, pontho ana ang'ono ndiye anafuna dzapiyang'anira.

⁷Ng'ombe na matika pinadyera pabodzi pene, pontho anawo anagonera pabodzi pene na mtendere. Nkhalamu zinadya maudzu ninga mumbachitirambo ng'ombe.

⁸Akachiya anasenzeka chifupi na mwida wa mbadza, pontho ana anapitisa manjawo kumwida wa chidyantchana.

⁹Paphiri yonsene yakupambulika ya Mulungu nkhabe dzakhala chinthu chakugoswa penu chakuvunga tayu. Padziko yonsene yapansi panadzala na udziwisi wa MBUYA ninga mumbachitira nyanza kudzala na madzi.

¹⁰Nsiku ikudza inafuna mfumu wachinchino wakubulukira m'dzinza yachifumu ya Davite dzakhala bandera kuna madzinza. Iwo anagumanyikana kuna iye, pontho kumbakhala iye kule kunakhala kwademelero.

¹¹Nsiku yeneyo ingafika, Mbuya anaphatisa pontho mphamvu zache kubweza kwawo anthu ache akhadasalira kumadziko a Asiria na Iguputo, Patirosi, Kushi, Elamu, Shinari, na Hamati, pontho na ntchuwa za pabara.

¹²Iye anakwiza m'dzulu bandera kudziwisa madzinza kuti iye anagumanyisa anthu adatamiswa a Aisraele mbabwezera anyakubalalika a ku Yuda ale kubulukira kunkhomo zonsene zinayi za dziko yapansi.

¹³Bivu ya Eferemu[18] inamala, pontho anyamalwa a Yuda anamaliratu. Eferemu nkhabeve dzachita bivu na Yuda tayu, penu Yuda kukhala nyamalwa wa Eferemu tayu.

¹⁴Pabodzi pene iwo anawumbikira Afilisti kumadokero dzuwa, mbavunga anthu ambakhala kumabulukiro dzuwa ale. Iwo anakunda Edomu na Moabu, pontho Aamoni anakhala pansi pa utongi wawo.

¹⁵MBUYA anaumisa mwendo wa bara ya ku Iguputo, pontho anadzesa mphepo yakupisa kuumisa mkulo wa Yufurate, mbaugawa kukhala pimikulo ping'ono-ping'ono pinomwe, towera munthu onsene akwanise kuwambuka na pakuuma.

¹⁶Kuna anthu ache Aisraele akhadasalira kweneko ale kunakhala msewu ukulu kubulukira ku Asiria ninga montho mukhali ipyo kale pikhabuluka makolo awo m'dziko ya Iguputo.