Read cisena YESAYA 13 Bible Online

YESAYA 13 - cisena bible

YESAYA 13

¹Izi ndi mphangwa zile zidadza kuna Yesaya mwana Amozi kubulukira kuna Mulungu zakulonga pya Babiloni:

²Pansonga ya phiri yakusowa pyakumera paoneka bandera yankhondo! Khuwani kuna anyankhondo pontho mukwize m'dzulu mkono wanu ninga chidziwiso chakwenda kasosa misuwo ya mzinda.

³MBUYA atonga anyankhondo ache akupambulika, anyankhondo ache amphamvu kudzamenya nkhondo kutchunyusa anthu azhangalira iye ale.

⁴Veserani kusokosa pamapiri ninga kwa chimwinji chikulu! Veserani chimpiningu cha maufumu, cha madzinza kugumanyikana pabodzi. MBUYA Wamphamvu zonsene akusasanya anyankhondo ache kwenda kunkhondo.

⁵Iwo akubulukira kumadziko akutali, kumadolomero a dziko yapansi. Na thangwi ya kuzhangali kwache, MBUYA akudza dzavunga dziko yonsene.

⁶Lira mwakuva kupha, thangwi nsiku ya MBUYA ili chifupi, nsiku inafuna dzavunga Nyamphamvu zonsene ile.

⁷Na thangwi ya penepi manja a munthu onsene anachita chiwewa, pontho kuwanga mtima kwa munthu onsene kunamala.

⁸Onsene anachita mantha, mbakundwa na kuva kupha, ninga kuva kupha kwa mkazi wa mimba pakubala. Iwo anayang'anizana unango na mwanzache mwamantha, pontho nkhope zawo zinaonesa manthawo.

⁹Yang'anani, nsiku ya MBUYA ikudza, nsiku yakukala mtima, yaukali wakugoswa, pontho ya shungu. Dziko yapansi inasanduka thando yatchetcha, pontho anyakudawa onsene anavungwa.

¹⁰Nyenyezi zakuthambo na magulu awo zinathima, dzuwa ingabuluka inaswipa, pontho mwezi hunaonesa cheza tayu.

¹¹MBUYA akulonga kuti, “Ndinadzesa nyatwa padziko yapansi mbanditchunyusa anyakudawika thangwi ya pyakudawa pyawo. Ndinachepesa munthu onsene wakunyada mbanditchunyusa munthu onsene wakupithemba pontho wakukala mtima.

¹²Ndinachitisa munthu kukhala okhonda oneka-oneka ninga golidi chadi-chadi, wakusowa pyakwanga ninga golidi wadidiletu wa ku Ofiri.

¹³Ndinachitisa thambo kutetemera, pontho dziko yapansi inatekenyeka pambuto pache pansiku inafuna ine MBUYA Wamphamvu zonsene kuonesa ukali wanga wakugoswa na shungu yanga.

¹⁴Munthu onsene anabwerera kuna anthu a kwawo, onsene anathawira ku madziko a kwawo, kubalalika ninga nyasa zakuthawa nyakukhulisa, pontho ninga mabira akusowa makabuswa.

¹⁵Tenepo nyakufuna dzaphatwayo analaswa, pontho onsene anakweshwayo anaphiwa na talasada.

¹⁶Akachiyawo anamenyeswa msolo kumiyala iwo akuona maso; pinthu pya m'nyumba mwawo pinapokoswa pontho akazi awo anaphatirirwa.”

¹⁷MBUYA akulonga kuti, “Yang'anani, ndinazhangalisa Amedi[19] kusosa Babiloni. Iwo nkhabe tsalakana pya siliva pontho kukomerwa na golidi tayu.

¹⁸Na mautawo iwo anapha aphale. Iwo nkhabe dzavera nsisi akachiya, penu dzava nyambalo na ana tayu.

¹⁹Babiloni ngufumu wa demelero pyakwanga kupiringana mafumu onsene; anthu ache ambaunyadira. Mbwenye ine MBUYA ndinavunga Babiloni ninga mudachitira ine pakutoma kuna mizinda ya Sodomu na Gomora!

²⁰Nkhabe na mbodzi ene anafuna dzakhalako tayu pamifendu yonsene inadzayo. Nkhabe Muarabu anafuna dzamangamo khumbi yache tayu, pontho nkhabe makabuswa anafuna dzadyesako mabirache tayu.

²¹Mbwenye inasanduka mbuto yakukhala nyama zam'tsanga pontho kule kunafuna dzamanga madzidzi pisa pyawo. Mphuwani zinakhala kweneko, pontho mbala zinanumpha-numpha pamadembe awo.

²²Nsanja pontho nyumba zachifumu zinatairira na kulira kwa matika pontho mibinzi. Ndzidzi wa Babiloni wakwana! Nsiku zache zasala chifupi kumala.”