Read cisena YESAYA 14 Bible Online

YESAYA 14 - cisena bible

YESAYA 14

¹MBUYA anavera nsisi pidzukulu pya Yakobo; mbaasankhula pontho kukhala anthu ache ene. Iye anaakhazikisa pontho m'dziko mwawo. Alendo anabwera mbakhala nawo mwenemo pontho mbaphatikana na pidzukulu pya Yakobo.

²Madzinza anaaphedza kubwerera kudziko kwawo, idaapasa MBUYA ile, tenepo madzinza anatumikira Aisraele ninga mabitchu. Ale adakwata Aisraele unyaperezo, chinchino Aisraele anati aakwatembo unyaperezo; iwo anatonga anthu ale ndzidzi unango adaapondereza.

³Pansiku inafuna MBUYA dzapasa Aisraele kululupirwa kuna pyakuva kupha pontho nyatwa pontho na kuna basa yakupha ikhakhakhamizwa iwo kuphata ile,

⁴imwe munaimba nyimbo yakusingirira mfumu wa ku Babiloni ninga tenepa: Nyakupondereza achitambo tani kuti agwe ninga tenepa? Ayi pyatani kuti ukali wache umale ninga tenepa?

⁵MBUYA akhobola mtswamu wa anyakuipa, pontho ndodo ya atongi,

⁶ale na kuzhangali kwawo adamenya anthu na mashoko okhonda lekeza, pontho na ukali wawo adakunda madzinza na shungu yokhonda mbombowa.

⁷Dziko yonsene yapansi muna kumatama na mtendere, pontho munthu onsene akuimba thangwi ya kukomerwa.

⁸Podi na miti ene ya paina pontho na mikungudza ya ku Lebanoni ikukusingirira mbilonga kuti, “Na thangwi yakuti chinchino iwe watchithiswa, nkhabeve nyakusaka nkhuni anafuna dzatitema tayu.”

⁹Dziko ya anyakufa yasasanyika kugumanikana na mfumu wa ku Babiloni. Mizimu ya anyakufa, ya ale akhali atongi padziko yapansi ikutekeseka kukutambira; mizimuyo ikulamuka m'mipando mwawo yachifumu.

¹⁰Yonseneyo inamtawira mbilonga kuna iye kuti, “Chinchino iwe wasandukambo wakusowa mphamvu ninga ife! Iwe wakhalambo sasawa na ife!”

¹¹Demelero yako yonsene lero wadza nayo kudziko ya anyakufa kuno, pabodzi pene na kulira kwa anyakatangale ene; iwe ukugona pa talimba ya mfunye, chakufinika chako mbichikhala unyoka.

¹²Iwe nthanda, mwana makalakwecha, wagwa kudzulu! Chinchino iwe waponywa pansi pa mataka, iwe ule ukhakunda madzinza.

¹³Iwe udalonga wekha ene kuti, “Ine ndinakwira kudzulu; ndinakwiza mpando wanga wachifumu padzulu pa nyenyezi za Mulungu; ndinakhala pampando wanga wachifumu paphiri yakumpoto pale pakhagumanyikana milungu.

¹⁴Ndinakwira kudzulu kupiringana makole; mbandipichitisa ndekha ene kukhala ninga Nyakudzulu-dzulu.”

¹⁵M'mbuto mwache iwe watchithiswa kudziko ya anyakufa, pansiletu m'Chiphompho chikulu.

¹⁶Anyakufa anafuna dzakuonawo anakuyang'anisisa mbalonga pya nyatwa zako mbati: “Ayi weneyu si munthu ule adatekenya dziko yapansi tayu, pontho kuchitisa maufumu kutetemera na mantha ule,

¹⁷munthu ule adachitisa dziko yapansi kusanduka thando yatchetcha, pontho kuvunga mizinda yache mbakhonda kutawirisa anyaperezo ache kwenda kwawo?”

¹⁸Mafumu onsene padziko yapansi akuikhwa m'masiye na demelero, kada munthu m'nthumbi yache.

¹⁹Kwache iwe nkhabe nthumbi tayu, tenepo mtembo wako wasiyiwa panja kuti uvunde; iwo wapondedzwa-pondedzwa mbuphimbirwa na mitembo ya anyakuphiwa, anthu adalaswa na talasada ale, ale atchithira ku Chiphompho chikulu chamiyala,

²⁰thangwi udasanduza dziko yako kukhala madembe mbupha anthu ako, iwe nkhabe ikhwa m'masiye ninga mafumu anango tayu. Nkhabe na mbodzi ene wa pidzukulu pyako pyakuipa anafuna dzakumbukwave tayu.

²¹Leka anyakucheka atome basawo! Ana achimuna a mfumu weneyu anafa thangwi ya kudawa kwa makolo awo. Nkhabe na mbodzi ene wa iwo anatonga dziko yapansi penu kudzazamo mizinda tayu.

²²MBUYA Wamphamvu zonsene akulonga kuti, “Ndinasosa dziko ya Babiloni mbandiisandusa madembe. Nkhabe chinafuna ine dzasiya tayu, nee mwana nee anyakusalira na moyo tayu. Ndalonga ndine MBUYA.

²³Ndinasandusa Babiloni kukhala dambo, tenepo madzidzi anakhala mwenemo. Ndinatswaira Babiloni na mtswairo wa kuvunga. Ndalonga ndine MBUYA Wamphamvu zonsene.”

²⁴MBUYA Wamphamvu zonsene adumbira kuti, “Ndimomwene pinthu pyasasanya ine pinati pichitike, pontho pinthu pyanyerezera ine kuchita pinati pichitike.

²⁵Ine ndinavunga Aasiria m'dziko mwanga ya Israele; ndinaapondedza m'mapiri mwanga. Goli-goli idaikha iwo m'khosi mwa anthu anga ndinaibulusa, pontho kubulusa nyatwa m'mapewa mwawo.”

²⁶Penepi ndiye pyasasanya ine kupichita padziko yapansi; wenewu ndi mkono wanga wafuthula ine kutchunyusa madzinza onsene.

²⁷Thangwi MBUYA Wamphamvu zonsene adanyerezera kuchita pyonsenepi, mbani anakwanisa kumkhondesa? Mkono wache wafuthuka kufuna kutchunyusa, tenepo mbani anakwanisa kuufunya?

²⁸Izi ndi mphangwa zakubulukira kuna Mulungu zile zidadza chaka chidafa mfumu Ahazia chile:

²⁹Lekani sekera, imwe Afilisti onsene, thangwi ndodo idakumenyani ile yasweka; kubulukira pa nyoka yeneyo panabuluka mbobo, pontho mbobo unabala chinyoka[20] chakupha.

³⁰Anyakutcherengaletu anagumana mpovu wadidi ninga mabira, pontho anyakusowa anakhala pakupata. Kwache dzinzanu ndinaivunga na njala, mbandipha anyakusalira na moyo ale.

³¹Lira, iwe msuwo wa mpanda! Kalala, iwe mzinda! Nyungulukani na mantha imwe Afilisti monsene! Makole afumbi akudza kubulukira kumpoto. Yeneyi ndi gulu ya anyankhondo akusowa mantha.

³²Tinaatawira tani aimiriri a dziko akubulukira kudziko ya Afilisti? Ife tinaapanga kuti MBUYA akhazikisa Zioni, pontho mwenemo anthu ache akusanyika ale anakhala pakupata.