Read cisena YESAYA 15 Bible Online

YESAYA 15 - cisena bible

YESAYA 15

¹Izi ndi mphangwa zakubulukira kuna Mulungu zakulonga pya Moabu: Ari wa ku Moabu avungwa, avungwa mosiku ubodzi basi, Kiri wa ku Moabu avungwa, avungwa mosiku ubodzi basi.

²Diboni akwira kunyumba ya milungu yache, kumbuto zache zakupembedzerapo kalira; Moabu akulirira Nebo na Medeba, Tsisi yawo yonsene yamalwa chingwa pontho na ndevu zawo zene.

³M'misewu anthu avala masakha; m'misika pontho pansoyi za nyumba onsene akukalala, fala kufa thangwi ya kulira.

⁴Heshiboni na Eleale akukalala, kulira kwawo kunakwanisa kuveka na ku Yahazi. Podi na anyankhondo ene akulira; kuwanga kwawo mtima kwamala.

⁵Mtimanga ukulirira Moabu; anyakuthawache afika mpakana ku Zoari kwenderatu ku Egilati-Shelishia. Anango awambuka msewu kwenda ku Luhiti, uku akulira; panjira ya ku Horonaimu iwo akwenda mbakalala thangwi ya kuvungika kwawo.

⁶Mkhwawa wa Nimurimu wamala uma kakata, pontho maudzu amala unyala; nkhabeve maudzu penu chakumera chiwisi chasalira tayu.

⁷Natenepo mfuma idagumanya iwo mbaikoya ile, amala kuikwata kuwambukira ku Phedi ya Mikotamu, kuyesa kuthawisa mfuma zawo.

⁸Konsene kwene kumadire a Moabu kukuveka kulira; chiliro chafika mpakana kumaluwani a Eglaimu, pontho kukalala kwawo kwafika mpakana ku Beerelimu.

⁹Mkulo wa mu Diboni wamala fira na chiropa, kwache ndinati ndithimize kuchita chinthu chakuipa pyakwanga kuna anthu a kweneko. Nkhalamu inaphata anyakupulumuka m'manja mwa Amoabu, pontho na anthu onsene anafuna dzasalira m'dzikomo.