Read cisena YESAYA 16 Bible Online

YESAYA 16 - cisena bible

YESAYA 16

¹Tumizani anabira ninga mtukwa kuna mtongi wa dzikoyo kubulukira ku Sela kuwambuka thando yatchetcha mpakana kuphiri ya Zioni.

²Ninga mbalame zakumbuluka-mbuluka zingathamangiswa m'pisa mwawo, sasawambo na akazi a ku Moabu pakuwambukira mkulo a Arinoni.

³Iwo akulonga kuna anthu a ku Yuda mbati, “Tipaseni uphungu, tipangeni chakuchita. Mwenemo dzuwa ikuswa miti tipaseni mthunzi wakukhala ninga mosiku; tibiseni ife, anyakuthawa kwawo, lekani kutipereka m'manja mwa anyamalwathu.

⁴Titawiriseni ife, Amoabu anyakuthawa kwawo kukhala namwe pabodzi m'dziko mwanu; titchinjirizeni kuna anyakufuna pyakutivunga ale.” Anyakupondereza anati amale, pyakuvunga dziko pyonsene pinaleka, pontho anyavinga anamalamo m'dzikomo.

⁵Na kufunana kokhonda mala mpando wachifumu unakhazikiswa; na kukhulupirika munthu anakhala penepo; iye anakhala chidzukulu cha Davite, iye nkhabe dzadembuka kuchita pinthu pyakulungama tayu, pontho anaonesesa kuti chilungamo chikutewezwa.

⁶Anthu a ku Yuda akulonga kuti, “Ife tava pya kunyada kumbachita anthu a ku Moabu kuti mbanthu akutumbama pontho akulunkuma, kwache kunyada kwawoko nkhwapezi nako.”

⁷Natenepo alekeni Amoabu kulira, onsene pabodzi pene kulirira Moabu. Kukalala na kusintili kukulu thangwi ya pitumbuwa pya mfesa zakuuma pikhadya iwo mumzinda wa Kiri-Hareseti.

⁸Mazunde a ku Heshiboni amala unyala pontho mfesa za Sibima zaunyalambo; atongi a madzinza amala pondedza mfesa zadidiletu, zile zikhadafika mpakana kumzinda wa Yazere, mbazifalikira mpakana m'thando yatchetcha; mitawi yache idatanthawira kubara.

⁹Natenepo ndikulirira mfesa za Sibima ninga kulira kudachita Yazere. Misozi yanga ikugwa pana iwe thangwi ya Heshiboni na Eleale, thangwi nkhabe na chinthu chene chakutchola penu chakuvuna chakuti chinachitisa anthu kukomerwa tayu.

¹⁰Kusekera na kukomerwa kwamala[21] m'mazunde a nsapo; nkhabe na mbodzi ene akukhuwa penu kuimba m'minda yamfesa tayu. Nkhabe na mbodzi ene akutchitchitha vinyu m'dzenje tayu.

¹¹Natenepo mtimanga ukulira ninga nyakatangale, kulirira Moabu, moyo wanga ukuva kupha thangwi ya Kiri-Hareseti.

¹²Moabu angadza pambuto yache yakupembedzerapo milungu, kumbachita iye nkhupitopesa yekha ene; iye angaenda kunyumba ya milungu yache kapemphera, ipyo nkhabe kumganyalisa tayu.

¹³Izi ndi mphangwa zikhadalonga MBUYA pakutoma pale pya Moabu.

¹⁴Tenepo chinchino MBUYA akulonga kuti, “Pangagwanda pyaka pitatu, ninga nyaganyo kulengesa ndzidzi wa kumala kwa ganyo yache, demelero ya Moabu inamala, pontho anthu ache azinji onsene analulupiswa. Tenepo anyakufuna dzasalirawo anakhala akuchepa, pontho akusowa mphamvu.”