Read cisena YESAYA 17 Bible Online

YESAYA 17 - cisena bible

YESAYA 17

¹Izi ndi mphangwa zakubulukira kuna Mulungu zakulonga pya Damasiko: “Yang'anani, Damasiko nkhabeve dzakhala mzinda tayu; iye anasanduka mulu wa madongolomwa.

²Mizinda ya Aroeri unasala yakusowa anthu; mbisanduka mbuto yakudyeserapo mabira, ale anakhala gunundu-gunundu mbapasowa na mbodzi ene wakuathuswa.

³Mizinda yakutchingwa na mpanda ya Eferemu[22] nkhabe dzaonekave tayu, pontho Damasiko nkhabe dzakhalave wachifumu tayu; anyakusalira na moyo a Aramu ale analulupiswa ninga mudachitirwa Aisraele. Ndalonga ndine MBUYA Wamphamvu zonsene.

⁴“Pansiku yeneyo demelero ya Yakobo inathima; manungo ache akunenepawo anamala pakatika.

⁵Ipyo pinakhala ninga nyakuvuna kukulumanya mphesi zakuimira, mbagwanda mapirache na manjache, ninga mumbachitira munthu kugwanda ngala za mapira m'phedi ya Refaimu.

⁶Anthu akuchepa ene ndiye anafuna dzasalira, ninga mumbachitira muti waolivi ungautekenya, pambasala basi nsapo ziwiri penu zitatu kunsongaletu, zinayi penu zishanu kusalira m'tchinde. Ndalonga ndine MBUYA Mulungu wa Israele.”

⁷Nsiku yeneyo anthu anaikha maso pana Nyakualenga, pontho anazungunukira kuna Nyakuchena wa Israele.

⁸Iwo nkhabeve dzanyindira maguwa adasasanya iwo na manjawo tayu, penu kutsalakana adzimunthu a milungu Ashera, pontho na maguwa akufukizirapo pyakununkhira adasasanya iwo na pyala pyawo.

⁹Nsiku yeneyo ingafika, mizinda yamphamvu idasiya iwo kuthawa Aisraele ile, inasanduka madembe ninga mudachitirambo mizinda ya Ahivi na Aamori.[23]

¹⁰Imwe Aisraele, mwaduwalira Mulungu, Nyankhombo wanu; imwe hamudakumbuke tayu Phanzwi, mpandanu wamphamvu. Natenepo podi kwene kuti imwe mulime pyanu minda yakupambulika[24] kulimira milungu yachilendo,

¹¹podi kwene kuti nsiku inabzala imweyo muzichitise kukula, pontho kuti machibese onthowo anabzala imwewo muzichitise kuchita maluwa, kwache pinafuna imwe dzavunapyo nkhabe dzakhala pinthu tayu pansiku ya utenda pontho kuva kupha kokhonda mala.

¹²Zhi! Upoko-poko wa madzinza azinji; iwo akugulung'unda ninga mabimbi a m'nyanza. Zhi! Chimpiningu cha anthu azinji; iwo akutitima ninga madzi makulu.

¹³Podi kwene kuti madzinza abwere ninga kukuka kwa madzi makulu, kwache iye angaasumulula iwo ambathawira kutali, kugwinywa ninga dzungu na mphepo pamapiri, pontho ninga maudzu m'chivumbulu.

¹⁴Na mawulo iwo ambagoswa, mbwenye na machibese nkhabe onekave tayu. Enewa ndi mamalisiro a anthu ambatithuswa mbapokosera pinthu pyathu ale.