Read cisena YESAYA 19 Bible Online

YESAYA 19 - cisena bible

YESAYA 19

¹Izi ndi mphangwa zakubulukira kuna Mulungu zakulonga pya Iguputo: Yang'anani, MBUYA apakira makole akuthamanga pyakwanga, iye akudza ku Iguputo. Mifanikizo ya Iguputo ikutetemera pamaso pache, pontho mitima ya Aiguputo yamala nyunguluka na mantha.

²MBUYA akulonga kuti, “Ndinalamusa kukhonda vana mu Iguputo, Muiguputo kumenyana Muiguputo mnzache, mbale kumenyana na mbaleache, tsanthemba kumenyana na tsanthembache, mzinda kumenyana na mzinda unango, ufumu kumenyana na ufumu unango.

³Aiguputo anataya mtima, mbandidzudzumisa pinthu pinasasanya iwo kupichita; iwo anavunza nzeru kuna mifanikizo, kuna anyakukhumira, pontho kavunza nzeru kuna mizimu ya anthu akufa.

⁴Ndinapereka Aiguputo m'manja mwa mtongi wakukala mtima, pontho mfumu waukali anaatonga. Ndalonga ndine Mbuya, MBUYA Wamphamvu zonsene.”

⁵Mkulo wa Nailo unapwa, pakumalisira pache mkulowo unauma kakata.

⁶Migelo ya madzi inanunkha; mikulo ya Iguputo inafikhirika mbiuma, pontho mitete na mabande pinaunyala.

⁷Pyakumera pyonsene pya m'khundu-khundu mwa mkulo wa Nailo, pontho mbewu zonsene zakulimwa m'khundu-khundu mwa Nailo zinadudumuka, izo zinambuluka na mphepo mbazikhonda dzaonekave.

⁸Amisiri a nsomba analira na kukalala, onsene anyakuphatisa basa pimedzo mumkulo wa Nailo; ale ambaponya makokotawo m'madzi analira.

⁹Anyakusasanya pakuphatisa basa thonje, pontho anyakuluka nguwo zakufewa anataya mtima.

¹⁰Anyaluso pakusasanya nguwo anasowa pyakuchita, pontho anyaganyo onsene anasanyika mtima.

¹¹Mathubu a mzinda wa Zoani ndi mapupwe ene pyawo; mapungu a mfumu wa ku Iguputo ambapereka uphungu wapezi-pezi. Ayi munalongeranji kuna mfumu kuti, “Ine ndi mbodzi wa anthu anzeru, pontho nyakufunza wa mafumu akale?”

¹²Mfumu wa Iguputo, amunako anzeru ali kupi? Mbaleke akuonese pontho akudziwise pinthu pyasasanya MBUYA Wamphamvu zonsene kupichita pana Iguputo.

¹³Mathubu a ku Zoani asanduka mapupwe, pontho akadamu a ku Memfisi amala phatwa m'maso; ale ndi mizati ya anthu ache aendesa Aiguputo m'tsanga.

¹⁴MBUYA adachitisa Aiguputo kuzunguzika; aachitisa kudzedzereka papinthu pyonsene pimbachita iwo, ninga mumbachitira nyakuledzera kutherezika na matapiko ache.

¹⁵Nkhabe na mbodzi ene mu Iguputo anakwanisa kuphedza tayu, penu akhale msolo penu mchira, nthambi yamchindu penu mtete.

¹⁶Nsiku yeneyo Aiguputo anakhala ninga akazi. Iwo anagedemera pyakwanga na mantha angaona kuti MBUYA Wamphamvu zonsene afuthula mkono wache kuatchunyusa.

¹⁷Dziko ya Yuda inakhala chakugoswa kuna Aiguputo; munthu onsene angava pya Yuda anagoswerwa, thangwi ya pinthu pyasasanya MBUYA Wamphamvu zonsene kudzapichita kuna Iguputo.

¹⁸Pansiku yeneyo mizinda mishanu ya Iguputo inalonga chilongero cha Kanani mbadumbira kutumikira MBUYA Wamphamvu zonsene. Ubodzi mwa mizindache inachemerwa Mzinda wa Dzuwa.

¹⁹Pansiku yeneyo panamangwa guwa yansembe ya MBUYA pakati na kati pa dziko ya Iguputo, pontho chiguwa ya chikumbuso cha MBUYA chinamangwa pa madire a Iguputo.

²⁰Penepi pinakhala chidzindikiro pontho umboni kuna MBUYA Wamphamvu zonsene m'dziko ya Iguputo. Iwo angalira kuna MBUYA thangwi ya anyakuapondereza, iye anaatumizira Nyankhombo, ule anaatchinjiriza mbaapulumusa.

²¹MBUYA anapitchulula yekha ene kuna anthu a ku Iguputo, tenepo pansiku yeneyo iwo anatawira kuti iye ndi MBUYA. Natenepo iwo anampembedza pakupereka nsembe zakupyerera na mitukwa. Iwo anadumbira kuna MBUYA Mulungu mbapichitadi.

²²MBUYA anatchunyusa anthu a ku Iguputo na muliri; iye anaatchunyusa, kwache anaawangisa. Iwo anazungunukira kuna iye, iyembo anava kupemphera kwawo mbaawangisa.

²³Pansiku yeneyo pakati pa Iguputo na Asiria panakhala msewu ukulu. Anthu a madziko awiriwa anafambirana, pontho madzinza a Iguputo na Asiria anapembedzera pabodzi pene.

²⁴Pansiku yeneyo Israele anakhala wachitatu, tenepo pabodzi pene na Iguputo na Asiria onsene anakhala mtsanzayiso kuna dziko yonsene yapansi.

²⁵MBUYA Wamphamvu zonsene anaatsanzayisa mbalonga kuti, “Nyakutsanzaya ndiwe Iguputo, iwe Asiria basa ya manjanga, pontho Israele nyakusankhulikanga.”