Read cisena YESAYA 2 Bible Online

YESAYA 2 - cisena bible

YESAYA 2

¹Pinthu pidatchulula Mulungu kuna Yesaya mwana Amozi pya Yuda na Yerusalemu mphipi:

²Nsiku zinadzazo phiri ya Nyumba ya Mulungu inakhazikiswa ninga phiri yakufunika kupita mapiri onsene; iyo inakhala pansongalonga paphiri, tenepo anthu onsene anagomokera kweneko.

³Madzinza azinji anabwera mbalonga mbati, “Dzani, tendeni kuphiri ya MBUYA,[4] kunyumba ya Mulungu wa Yakobo, kuti iye akatifunzise njira zache, towera titeweze njira zachezo.” Podi nkhu Zioni kunafuna bulukira upangizi wache kule, pontho nkhu Yerusalemu kule kunafuna bulukira mafala a MBUYA.

⁴Iye anatonga miseru pakati pa madzinza mbamalisa kukhonda vana pakati pa anthu azinji. Iwo anafula matalasadawo a nkhondo kukhala mapaza, pontho madipawo kukhala pikwakwa. Nkhabe dzinza inafuna dzachita nkhondo na dzinza inzache, penu kufunzisa pontho anthu kumenya nkhondo tayu.

⁵Imwe pidzukulu pya Yakobo, tendeni tifambe m'cheza cha MBUYA.

⁶Imwe mwakhonda pidzukulu pya Yakobo, anthu anu. Dziko yawo yamala dzala na anyakuombedza akumabulukiro dzuwa; iwo ambakhumira ninga anthu a kudziko ya Afilisti, pontho ambachita ushamwali na anthu a madzinza anango.

⁷Dziko yawo yamala dzala na siliva na golidi; mfumawo nkhabe madire tayu. M'dziko mwawo muna akavalo okhokha; iwo nkhabe sowa pingolo pyankhondo tayu.

⁸Dziko yawo yamala dzala na mifanikizo; iwo ambalambira pinthu pidasasanya iwo na manjawo, pinthu pidasasanya iwo na pyala pyawo.

⁹Natenepo anthu onsene anachepeswa; munthu onsene analulupiswa, MBUYA, lekani kualekerera.

¹⁰Pitani m'nkhwimba zamwala, penu bisalani m'madzenje kuthawa ukali wa MBUYA, pontho demelero yache yachifumu.

¹¹Kutumbama kwa anthu kunalulupiswa pontho kugaya kwa anthu kunamaliswa; pansiku yeneyo anafuna dzakuzwa ndi MBUYA ene basi.

¹²MBUYA Wamphamvu zonsene akoya nsiku inafuna iye lulupisa anyakugaya na anyakutumbama onsene, nsiku inafuna iye dzachepesa anyakupikuza,

¹³dzavunga miti yamkungudza ya ku Lebanoni, yakulapha pontho yakunthemphuka, pontho na miti yonsene yamthundu ya ku Bashani,

¹⁴dzagwisa mapiri onsene akulapha, pitunda pyonsene pikulu-pikulu,

¹⁵nsanja zonsene zakulapha, pontho mpanda onsene wamphamvu,

¹⁶dzachitisa miyadiya yonsene mikulu-mikulu ya anyamalonda, pontho miyadiya yonsene yakubalika kulobzeka.

¹⁷Kutumbama kwa anthu kunamala pontho kugaya kwa anthu kunalulupiswa; pansiku yeneyo anafuna dzakuzwa ndi MBUYA ene basi,

¹⁸pontho mifanikizo yonsene nkhabe dzaonekave pontho tayu.

¹⁹Pitani m'nkhwimba zamwala penu bisalani m'madzenje kuthawa ukali wa MBUYA, pontho demelero yache yachifumu, iye angadza dzatekenya dziko yapansi.

²⁰Pansiku yeneyo anthu anaponya kuna anyamfuko na anyakalemwalemwa mifanikizo yawo yasiliva na yagolidi, idasasanya iwo kuti aipembedze ile.

²¹Anthu anathawira kunkhwimba zamwala, pontho kuchingolokodyo m'mapiri kuthawa ukali wa MBUYA, pontho demelero yache yachifumu, iye angadza dzatekenya dziko yapansi.

²²Lekani kunyindira munthu, ule ambafa. Apo iye anaphedzanji?