Read cisena YESAYA 21 Bible Online

YESAYA 21 - cisena bible

YESAYA 21

¹Izi ndi mphangwa zakubulukira kuna Mulungu zakulonga pya thando yatchetcha ya chifupi na bara: Ninga chivumbulu kutswaira thando yatchetcha ya Negebu, sasawambo nyatwa zinafika kubulukira kuthando yatchetcha, kubulukira kudziko yakuchitisa mantha.

²Masomphenya akugoswa atchululwa kuna ine; phanga akuchita pyauphanga, pontho nyakupokosera pinthu akupokosera. Elamu ndoko kasose! Media manga msasa kuzungulira mizinda kuikunda! Ine ndinamalisa nyatwa zonsene zidadzesa Babiloni zile.

³Na thangwi ya penepi manungo anga akuva kupha; ndidava mtswotswo ninga mkazi wamimba pakulekwa; ine ndapaluka mtima na pinthu pinava ine, pontho ndikuswipa mtima na pinthu pinaona ine.

⁴Mtimanga uli dididi kudima, pontho mantha akundichitisa kutetemera; chidodo chikhadikhira ine chile chidasanduka chakugoswa kuna ine.

⁵Iwo asasanya pathebulu, mbathasika masakala, iwo akudya na kumwa kwene! Lamukani imwe mathubu, tswingani mafuta pyakugedera matswimo pyanu!

⁶MBUYA akulonga kuna ine kuti, “Ndoko kaikhe nyakulondali, towera alonge kuna iwe pyonsene pinaona iye.

⁷Iye angaona anyankhondo akupakira akavalo akufamba awiri-awiri, anyakupakira mabulu pontho anyakupakira ngamila, mpange akhale m'maso, ndikulonga kukhala m'maso chadi-chadi.”

⁸Tenepo nyakulondali ule adakhuwa mbati, “Nsiku na nsiku, mbuyanga ndimbaimira ngolokoto pansanja; mosiku onsene ndimbakhala m'maso pabasanga.

⁹Ngayang'anani anyankhondo akupakira akavalo akufamba awiri-awiri akudza. Natenepo iye akutawira kuti, ‘Babiloni agwa, tipi-tipi, mifanikizo yonsene ya milungu yache ili mbwee pansi!’ ”

¹⁰Anthu anga akububudwa pambuwa, ine ndinakupangani pinthu pyava inembo kubulukira kuna MBUYA Wamphamvu zonsene, kubulukira kuna Mulungu wa Israele.

¹¹Mphangwa zakubulukira kuna Mulungu zakulonga pya Edomu: Munthu unango akundichemera kubulukira ku Seiri kuti, “Nyakulondaliwe kunja kunaecha lini kani? Nyakulondaliwe kunja kunachena lini kani?”

¹²Nyakulondali akutawira kuti, “Kunja kunati kueche chinchino pano, kwache kunati kudoke pontho chinchino pano. Ngakhala unafuna pyakuvunza, vunzatu mphapo; mbubwere pontho kachiwiri kache.”

¹³Izi ndi mphangwa zakubulukira kuna Mulungu zakulonga pya Arabia: Imwe anthu a ku Dedani, ale akufamba m'magulu-magulu mbamumanga misasa m'thando yatchetcha ya Arabia,

¹⁴dzani na madzi dzapasa anyakuva nyota; imwe anyakukhala ku Tema, dzani na pyakudya dzapasa anyakuthawa kwawo.

¹⁵Iwo akuthawa talasada yakusololeka, akuthawa mauta akukungika, pontho mbebe wa nkhondo yakugoswa.

¹⁶MBUYA akulonga kuna ine kuti, “Kwasala chaka chibodzi ninga nyaganyo kulengesa ndzidzi wa kumala kwa ganyo yache, chilemedzo chonsene cha anthu a ku Kedara chinamaliratu.

¹⁷Anyakusalira na moyo pakati pa amuna akukhala na mauta, anyankhondo amphamvu a ku Kedara ale anakhala akuchepa. Ndalonga ndine MBUYA Mulungu wa Israele.”