Read cisena YESAYA 22 Bible Online

YESAYA 22 - cisena bible

YESAYA 22

¹Izi ndi mphangwa zakubulukira kuna Mulungu zakulonga pya Phedi ya Masomphenya: Chinakunensani ninji, kuti monsene muchite kukwira pansoyi za nyumba?

²Mumzinda monsene muna uviya-viya, mzinda wa chimpiningu na kuzunguzika? Anthu adafa ale hadaphiwe na talasada, penu kufa kunkhondo tayu.

³Akadamu anu onsene amala thawa pabodzi pene; iwo amala phatwa okhonda phatisa basa na uta ene. Onsene mudaphatwa ale mudakwatwa unyaperezo pabodzi pene, kuthawa pyawo na bepe mwenemo anyamalwa ali pyawo kutali nawo.

⁴Natenepo ine ndidalonga kuti, “Bulukani pamaso panga; ndilekeni ndilire pyanga mwakusisima. Lekani yesera kundithondoza thangwi ya kuvungika kwa anthu angaku.”

⁵Mbuya, MBUYA Wamphamvu zonsene ana nsiku yache inafuna iye dzakunda pontho kudzudzumisa m'Phedi ya Masomphenya, nsiku inafuna iye dzagomola mpanda, pontho dzatairira mapiri chiliro chakufuna chiphedzo.

⁶Anyakupakira akavalo pabodzi pene na anyakufambisa pingolo a ku Elamu adadza na mauta pontho matswimo; anyankhondo a ku Kiri adachinjika pyakugedera matswimo pyawo.

⁷Maphedi ako adidiletu amala dzala na pingolo; anyakupakira akavalo amala khala m'mbuto zawo m'misuwo ya mzinda;

⁸anyamphamvu onsene a Yuda amala khutchwa mano. Pansiku yeneyo imwe mudayang'ana pida pya nkhondo pile pikhali m'Chinyumba cha Msitu;

⁹imwe mudaona kuti mpanda wa mzinda wa Davite ukhali na mwakugumuka muzinji mwene; imwe mudakoya madzi pathawale ya kuphedi.

¹⁰Imwe mudalengesa nyumba mu Yerusalemu mbamugwisa nyumba, towera mumange pontho mpanda wakuwanga.

¹¹Imwe mudamanga thawale pakati pa mafufu mawiri kukoyeramo madzi akubulukira kuthawale yakale, kwache imwe nee mudayang'ane kuna Mulungu adaimanga ule tayu, penu kutsalakana pya ule adasasanyiratu pya kumangwa kwa thawaleyo tayu.

¹²Mbuya, MBUYA Wamphamvu zonsene adakuchemerani nsiku yeneyo kuti mulire na kukalala, kuchinga tsisi yanu pontho kuvala masakha.

¹³Mbwenye m'mbuto mwache imwe mudakomerwa na kusekera, mudapha ng'ombe na mabira, mudadya nyama na kumwa vinyu! Imwe mudalonga kuti, “Mbatidyeni pyathu na kumwa pyathu, podi mangwana tinafa!”

¹⁴Mbuya, MBUYA Wamphamvu zonsene atchulula penepi m'khutu mwanga mbati, “Kudawa kweneku nkhabe dzalekererwa tayu mpakana nsiku yakufa kwako. Ndalonga ndine Mbuya, MBUYA Wamphamvu zonsene.”

¹⁵Mafala awa ndiye alonga Mbuya, MBUYA Wamphamvu zonsene: “Ndoko kalonge kuna nyakuyang'anira, kuna Shebina, mkadamu wa kunyumba yachifumu:

¹⁶Ninji chinachita iwe pano, pontho mbani akupasa utongi kuti usasanye masiye ako ene pano, kusema masiye paphiri kusasanya mbuto yako yakupumirapo m'mwala?

¹⁷“Chita mphole MBUYA ali chifupi kukumbalakanya kuti akuponye mwamphamvu, iwe munthu wamphamvu zache.

¹⁸Iye anakukanya-kanya ninga mpira mbakuponyera m'dziko ikulu. Kweneko iwe unafa pontho kweneko pingolo pyako pyakubalika pinasalira, iwe munthu wakuchitisa manyadzo kunyumba ya mbuyako!

¹⁹Ine ndinakubulusa pampando wako wa ukadamu, mbandikupokosera chidzo chako.

²⁰“Pansiku yeneyo ndinachemeresa nyabasanga Eliakimu mwana Hilikia.

²¹Ine ndinamvazika mkhanjo wako mbandimmanga na mcheka wako m'chuno mwache, pontho ndinapereka utongi wako kuna iye. Iye anakhala baba wa anthu anyakukhala mu Yerusalemu, pontho kuna banja ya Yuda.

²²Pamapewa pache ndinaikhapo mfungulo wa utongi wa banja ya Davite; panafungula iye nkhabe na mbodzi ene anakwanisa kufungapo tayu, pontho panafunga iye nkhabe na mbodzi ene anakwanisa kufungulapo tayu.

²³Ine ndinamchitisa kukhazikika ninga ntchiri pa chidzo chache; iye anakhala ninga mpando wachilemedzo kuna banja ya babache.

²⁴Mbwenye anache na pidzukulu pya pa banjache anakhala mitolo yakulemera pana iye. Iye anakhala ninga mphanda yakumanikwa pyombo pyonsene kutomera ndilo mpakana milinga.

²⁵“Pansiku yeneyo mphanda idakhomwa mwamphamvu ile inatekenyeka mbidzagwa, tenepo pyombo pyamanikwa mwenemopyo pinagwambo pansi. Ndalonga ndine MBUYA Wamphamvu zonsene.”