Read cisena YESAYA 23 Bible Online

YESAYA 23 - cisena bible

YESAYA 23

¹Izi ndi mphangwa zakubulukira kuna Mulungu zakulonga pya Turo: Lirani imwe anyakufambisa miyadiya ya ku Tarisisi! Thangwi Turo avungwa mbakhonda siyirwa na nyumba ene penu na gombe ene. Kubulukira kudziko ya Kipro kwadza mphangwa kuna iwo.

²Matamani, imwe anyamntchuwa pontho imwe anyamalonda a ku Sidoni ale mwafuma na maulendo anu a pabara.

³Kugwanda na pabara iwo adadza na tirigu wa ku Shihori, pontho pyakuvuna pya ku Nailo, imwe mudasanduka msika wa madzinza azinji ene.

⁴Chita manyadzo iwe, Sidoni, mzinda wakutchingwa na mpanda m'khundu-khundu mwa bara ule, thangwi bara yabulusa fala kuti: “Ine chipo sidave mtswotswo wakubala, penu kubala mwana tayu; chipo ine sidalele ana achimuna, penu kukuzambo ana achikazi tayu.”

⁵Mphangwa zingadza ku Iguputo, iwo anatutumuka na kuchita mantha thangwi ya pinava iwo pya Turo.

⁶Wambukirani ku Tarisisi; lirani, imwe anyamntchuwa.

⁷Ayi wenewu ndiye mzindanu wakuveka ule, mzinda wamvula zakale, ule manyalo ache amuendesa kakhazikika kudziko yakutali?

⁸Mbani adasasanya kuti penepi pigwere Turo, mzinda wakupereka chilemedzo kuna anthu, ule anyamalondache mbana mafumu, pontho mbakuveka pyakwanga padziko yonsene yapansi?

⁹MBUYA Wamphamvu zonsene ndiye adapisasanya, kumalisa kunyada kwa demelero ya onsene, pontho kululupisa anyakulemedzwa onsene padziko yonsene yapansi.

¹⁰Mubalalikane m'dziko mwanu ninga mkulo wa Nailo, imwe anthu a ku Tarisisi, thangwi imwe nkhabe dzakhalave na gombe kuchitira malonda tayu.

¹¹MBUYA ayambasa mkono wache pabara mbachitisa maufumu kutetemera na mantha. Iye apereka matongero akulonga pya Fonike kuti mizindache yakutchingwa na mpanda imale vungwa.

¹²Iye akulonga kuti, “Nkhabe dzakomerwave tayu, imwe anthu a ku Sidoni, chinchino munakhala pampani-pani! “Wambukirani ku Kipro; podi na kweneko kwene imwe nkhabe dzagumanako kupuma tayu.”

¹³Yang'anani dziko ya Babiloni, anthu ache chinchino nkhabeve basa tayu! Anthu a ku Asiria asandusa dzikoyo kukhala mbuto ya nyama za m'tsanga; iwo adamanga nsanja za nkhondo, mbagomola mizindache yakutchingwa na mpanda pontho kuisandusa kukhala madembe.

¹⁴Lirani, imwe anyakufambisa miyadiya ya ku Tarisisi thangwi mzindanu wakutchingwa na mpanda wamala vungwa!

¹⁵Pandzidzi wenewo Turo anaduwalirwa pyaka makumanomwe, ndzidzi wakukhala mfumu na moyo. Mbwenye pakumala pyaka makumanomwe, pinthu pinachitika kuna Turo ninga montho mudaimbira nyimbo yakulonga pya puta kuti:

¹⁶“Thukula nyakatangale wako mbuzungulire mumzinda, iwe puta wakuduwalika; imba nyakatangale wako mwadidi, imba nyimbo zizinji zene, towera anthu akukumbukembo.”

¹⁷Pakumala pyaka makumanomwe, MBUYA anachita pinthu kuna Turo. Mzindawo unabwerera kubasache yakale mbukhala ninga puta kuchita malondache na maufumu onsene a dziko yapansi.

¹⁸Kwache pinthu pimbaganyali iye kubulukira kumalondache pinapambulirwa kuna MBUYA; iye nkhabe dzaumirwa napyo, penu kupikoya kwene tayu, mbwenye anapipereka kuna anyakupembedza MBUYA kuti agulire pyakudya pizinji pontho nguwo zakubalika.