Read cisena YESAYA 24 Bible Online

YESAYA 24 - cisena bible

YESAYA 24

¹Yang'anani, MBUYA anavunga dziko yapansi mbaisandusa thando yatchetcha; anaisakaza mbabalalisa anyakukhala mwenemowo.

²Pinakhala chibodzi-bodzi kuna anyansembe na kuna anthu, ambuya na kuna mabitchu, ambuya achikazi na kuna mabitchu achikazi, anyakugulisa na kuna anyakugula, anyakubwereka na kuna anyakubwerekesa, anyamangawa na kuna anyakufiyalisa.

³Dziko yapansi inavungikiratu monsene mwene mbidzamala pokoserwa pinthu pyache pyonsene. MBUYA ndiye alonga mafala enewa.

⁴Dziko yapansi ikuuma na kuunyala; dziko yonsene ili panyatwa zikulu; thambo na dziko yapansi pinamala.

⁵Dziko yapansi yamala ipiswa na anthu ache; iwo akhonda kuvera matongero mbaswa mwambo pontho na chiverano chokhonda mala chile.

⁶Natenepo dziko yapansi ina dzedze; anthu ache akusanyika thangwi ya kudawa kwawo. Ndi thangwi yache anthu a padziko yapansi akupiswa moto, tenepo anyakusalira na moyo ngakuchepa pyakwanga.

⁷Mfesa zikududumuka pontho vinyu akusowa; munthu onsene ule akhakomerwa, lero akubulira.

⁸Kulira kwadidi kwa pisekese kuli lukutu noo, kusokosa kwa anthu akukomerwa, lero wamala, pontho anyakatangale akulira mwadidi ale ali ngwindi.

⁹Kumwa vinyu na nkhetekete pyamala; bwadwa ngwakujuja kuna anyakuumwa.

¹⁰Mzinda wakuzunguzika wasala madongolomwa ene basi; msuwo panyumba yonsene wamala piringidzwa mwakuti nkhabe munthu na mbodzi ene anakwanisa kupitamo.

¹¹M'misewu iwo akulira vinyu; kukomerwa konsene kwasanduka kulira, kusekera nkhabemove tayu m'dziko yapansi.

¹²Mzinda wasala madembe, misuwo yache yamala gwandwa-gwandwa.

¹³Penepi ndiye pinafuna dzachitika kuna dziko yapansi pakati pa madzinza, ninga mumbachitirwa muti waolivi kugubudzwa, pontho ninga kumala kwa kutchola nsapo zamfesa.

¹⁴Iwo akugaluza fala, akukhuwa thangwi ya kukomerwa; kubulukira kumadokero dzuwa, iwo akukuza ufumu wa MBUYA.

¹⁵Natenepo imwe anthu akumabulukiro dzuwa pontho imwe anyamgombe perekani demelero, kuna MBUYA; kuzani dzina ya MBUYA Mulungu wa Israele.

¹⁶Kubulukira kumadolomero a dziko yapansi tikuva kuimba kuti, “Demelero kuna Nyakulungama.” Kwache ine ndikulonga kuti, “Ndamaliratu, ndamaliratu pyanga! Dzedze kuna ine! Mphandu zikusandukira! Na upandu mapanga akusandukira!”

¹⁷Pyakugoswa, mulindi na msampha pikukudikhirani, imwe anthu a padziko yapansi.

¹⁸Munthu onsene wakuthawa pyakugoswapyo anagwera m'dzenje; munthu onsene wakubuluka m'dzenjemo anakweshwa na msampha. Misuwo ya madzi makulu kudzulu yamala baulwa, maziko a dziko yapansi akutekenyeka.

¹⁹Dziko yapansi yamala panduka-panduka, dziko yapansi yamala didimuka monsene mwene, pontho ikutekenyeka pyakwanga pene.

²⁰Dziko yapansi ikudzedzereka ninga nyakuledzera, ikubwanyuka ninga khumbi kubwanyuka na mphepo; iyo yalemerwa pyakwanga na pyakudawa pya anyakupandukira mwakuti ikugwa, mbichimwana kulamuka pontho.

²¹Pansiku yeneyo MBUYA anatchunyusa anyamphamvu onsene a kudzulu, pontho mafumu onsene a pansi pano.

²²Iwo anagumanyiswa pabodzi pene, ninga anyaperezo akuponywa m'dzenje; iwo anafungirwa m'kadyaboso mbatchunyuswa pangagwanda nsiku zizinji zene.

²³Mwezi unanyala, dzuwambo inachita manyadzo; thangwi MBUYA Wamphamvu zonsene anatonga paphiri ya Zioni na mu Yerusalemu, mbaonesa demelero yache pamaso pa akulu-akulu a anthu ache.