Read cisena YESAYA 25 Bible Online

YESAYA 25 - cisena bible

YESAYA 25

¹Ande, MBUYA, imwe ndimwe Mulungu wanga; ine ndinakulemedzani mbandikuza dzinanu, thangwi imwe mwachita pinthu mwakukhulupirika pontho mwakudodomesa, pinthu pidasasanya imwe kale ene kupichita pile.

²Imwe mwasandusa mzinda kukhala mulu wa madongolomwa, mzinda wakutchingwa na mpanda kukhala madembe, mwasandusa nyumba za anyamalwathu kuti zileke khalapove; iyo nkhabe dzamangwa pontho tayu.

³Na thangwi yeneyi anthu amphamvu zawo anakulemedzani; mizinda ya anthu aukali inakugopani.

⁴Imwe ndimwe pakubisala pa anyakutcherenga, pakubisala pa anthu akusowaletu pakuphata ndzidzi wa nyatwa, mthunzi wawo kuatchinjiriza kuna chonzi, pontho nsanja kuna mkatu-katu wa dzuwa. Thangwi muya wa anthu aukali wakhala ninga chonzi, chakumenya fufu,

⁵pontho ninga mbebe wa tchetcha m'thando. Imwe mumbambombowesa chimpiningu cha anyamalwathu; ninga chigudu-gudu kumbombowesa kupisa kwa dzuwa, sasawambo imwe mumbamatamisa nyimbo ya anyakukala mtima.

⁶Paphiri yeneyi MBUYA Wamphamvu zonsene anasasanyira anthu onsene udyi ukulu, phwando ya vinyu wadidiletu, phwando ya nyama yakununa pontho vinyu wakudzipa.

⁷Paphiri yeneyi iye anabulusa pyakutsukwalisa pile pimbaphimbira anthu onsene chinguwo chile chimbampsampsira anthu a madzinza onsene;

⁸iye anabulusa imfa kwenda na kwenda. MBUYA Mulungu anapukuta misozi m'maso monsene; iye anakunundula manyadzo a anthu ache padziko yonsene yapansi. Ndalonga ndine MBUYA.

⁹Pansiku yeneyo iwo analonga kuti, “Ndimomwene iye ndi Mulungu wathu; ife tidamnyindira, tenepo iye adatipulumusa. Iyeyu ndi MBUYA, ife tidamnyindira; tenepo mbatikomerweni na kusekera thangwi ya kutipulumusa kwache.”

¹⁰Mkono wa MBUYA unakhala pana phiri yeneyi; mbwenye Moabu anapondedzwa pansi pa manyalo pache ninga mumbapondedzwerwa maudzu m'dzenje kuti avunde.

¹¹M'dzenjemo iwo anadadamira kufuna kubulukamo ninga mumbachitira nyakusambirira, mbwenye Mulungu anamalisa kudungudza kwawo nee kuwerengera kuchenjera kwachita manjawo kule tayu.

¹²Iye anagwisa mipandawo yakulapha yakuzungulira mizindawo kuigwisiratu phaphathike; iye anaigwisira pansi pa fumbiletu.