Read cisena YESAYA 26 Bible Online

YESAYA 26 - cisena bible

YESAYA 26

¹Pansiku yeneyo nyimbo ishi inaimbwa m'dziko ya Yuda: Ife tina mzinda wamphamvu; Mulungu ambautchinjiriza na mpanda wa mafufu amphamvu.

²Fungulani misuwo towera dzinza yakulungama ipite, dzinza yakukhulupirika.

³Imwe mumbapasa mtendere chadi-chadi kuna munthu ule ali nganganga pana imwe, thangwi ambanyindira muna imwe.

⁴Nyindirani MBUYA kwenda na kwenda, thangwi MBUYA Mulungu ndi Phanzwi yakukhala na kukhala.

⁵Iye ambachepesa anyakugaya, mbavunga mzinda wamphamvuwo; iye amala kuugomola mbaumwalaza mpakana fumbi.

⁶Manyalo akuupondedza-pondedza, manyalo a anyakuponderezwa, mphondero ya anyakutcherenga.

⁷Njira ya anyakulungama yamala ndendemezwa; ande, imwe Nyakulungama, mumbamwalaza njira ya anyakulungama.

⁸Ande, MBUYA, ife timbafamba na njira ya matongero anu, ife timbanyindira imwepo; mtimathu onsene umbatchuwa kulemedza dzinanu.

⁹Mtimanga umbatchuwa imwepo na mosiku; na machibese moyo wanga umbakufunani pyakwanga pene. Ndzidzi wanu ungakwana wakutonga dziko yapansi, anthu a padziko yapansi ambadziwa kuchita chilungamo.

¹⁰Podi kwene kuti anyakudawika ambakomerwa mtima, iwo nkhabe dziwa kuchita pyakulungama tayu; podi kwene kuti akhale pyawo m'dziko ya anyakulungama, iwo ambathimiza kuchita pyakuipa basi, mbakhonda tsalakana pya ufumu wa MBUYA.

¹¹MBUYA, imwe mwawizula mkono wanu m'dzulu kwache iwo nkhabe kuuona tayu. Alekeni aone phinga ina imwe pana anthu anu, iwo mbachite manyadzo; moto udakoyera imwe anyamalwanu ule mbuapise.

¹²MBUYA imwe mumbatipasa mtendere; pinthu pyonsene pyakwanisa ife kupichitapi mwatichitira ndimwepo.[26]

¹³Ande, MBUYA, Mulungu wathu, podi kwene kuti tikhale pyathu pansi pa atongi anango, kwache dzinanu ene basi ndiye imbalemedza ife.

¹⁴Iwo amala kufa, pontho nkhabekove kunja kuno tayu; adefuntu ale nkhabe dzabwerera pontho tayu. Imwe mudaatchunyusa mbamuachitisa kuvungika; iwo nkhabe dzakumbukwave tayu.

¹⁵Imwe, MBUYA, mwakuza dzinzathu. Imwe mwakulisa dzinzathu mbamupipasa mwekha ene demelero; imwe mwakulisa madire onsene a dziko.

¹⁶MBUYA, iwo adadza kuna imwe mbali khuma-khuma; ndzidzi udaatchunyusa imwe, iwo adapemphera kuna imwe.

¹⁷Ninga mkazi wamimba pakubala ambabzongonyoka-bzongonyoka na kulira thangwi ya mtswotswo, sasawa ife tikhali tenepombo pamaso panu, MBUYA.

¹⁸Ife tidava mtswotswo mbatisanyika ninga mkazi wamimba kwache ife sidabale munthu na mbodzi ene tayu. Ife sidadzese tayu chipulumuso padziko yapansi pano, pontho sidabale munthu na mbodzi ene kukhala m'dziko yapansi tayu.

¹⁹Kwache anyakufanu ale anakhala pontho na moyo; mitembo yawo inalamuka pontho. Imwe ale muli m'mataka lamukani mbamukhuwe thangwi ya kukomerwa. Ninga bume kusisimusa maudzu kumachibese, sasawambo imwe MBUYA munalamusa anyakufa.

²⁰Ndokoni anthu anga, pitani m'masubi mwanu mbamufunge misuwo; pibiseni mwekha ene ndzidzi pang'ono ene basi kufikirana ukali wa MBUYA umale.

²¹Yang'anani, MBUYA akubuluka kumbuto kwache kudzatchunyusa anthu a padziko yapansi thangwi ya pyakudawa pyawo. Dziko yapansi inabulusa pakwecha chiropa chidachuchiswa pana iyo; iyo nkhabeve dzabisa anyakuphiwa mwenemo ale tayu.